धादिङमा युवाहरूबीच ‘ग्याङफाइट’ हुँदा एक जनाको मृत्यु भएको छ।
खनियावास गाउँपालिका वडा नम्बर ४ मा मंगलबार राति करिब १० बजे छ/सात जनाको समूहमा रहेका युवाहरूको झडप हुँदा अर्का एक जना गम्भीर घाइते भएको जिल्ला प्रहरी कार्यालय धादिङले जनाएको छ।
'झडपपछि गम्भीर घाइते भएका ३२ वर्षीय सन्तबहादुर तामाङको उपचारका क्रममा धादिङ अस्पतालमा मृत्यु भएको छ भने घाइते रविन तामाङको काठमाडौंस्थित ग्रिनसिटी अस्पतालमा उपचार भइरहेको छ,' जिल्ला प्रहरी कार्यालय धादिङका प्रमुख रवीन्द्र रेग्मीले भने।
रेग्मीका अनुसार युवाहरूबीच पुरानो रिसिइबीका कारण झगडा भएको हुन सक्ने प्रारम्भिक अनुसन्धानले देखिएको छ।
झडप घरभित्रै भएको र त्यहाँ भएका सामान नै हतियारका रूपमा प्रयोग गरिएको पाइएको उनले बताए।
झडपमा संलग्न आशंकामा दुई जनालाई प्रहरीले नियन्त्रणमा लिएको जनाइएको छ।