गत शुक्रबार अन्नपूर्ण आधार शिविरको पदमार्गमा गएको हिमपहिरोपछि हराइरहेका सात जनाको सेनाले खोजीकार्य जारी राखेको छ।
हराइरहेका ४ जना कोरियन पर्यटक तथा ३ जना नेपाली गाइडहरुको सेनाको पोखरास्थित सेकेण्ड रेञ्जर गणका गणपति सहितको उद्धार टोलीले मंगलबारदेखि खोजीलाई तीव्र पारेको हो।
सेनाको उद्धार टोलीलाई नेपाली सेनाको ईक्वेरल हेलिकोप्टरद्वारा घटनास्थलबाट करिब २० मिनेटको पैदल दुरीमा अवस्थित देउराली भन्ने स्थानसम्म पुर्याइएको थियो।
उद्धार टोलीले कोरियन पर्यटकहरु हिम पहिरोमा पुरिएको भनिएको स्थानमा करिव छ मिटर गहिराईसम्म खन्दा पनि हालसम्म केही फेला नपरेको जनाएको छ।
उक्त टोलीले नेपाली गाईडहरु पुरिएको भनी आशंका गरिएको सम्भावित स्थानमा पनि खोजी कार्य जारी राखेको छ। साथै हराइरहेका नेपाली गाईडका दुई जना आफन्तहरु समेतले उद्धार कार्यमा सहयोग गरिरहेका छन्।
