मकवानपुरको एभरेष्ट पानारोमा रिसोर्टमा निसास्सिएर मृत्यु भएका आठै जनाको शव आफन्तले बुझेका छन्।
प्रहरीका अनुसार मृतकको शव बिहीबार आफन्तले बुझेका हुन्।
नेपालस्थित भारतीय दूतावासको सहकार्यमा मृतकहरूको शव आफन्तलाई बुझाइएको महानगरीय प्रहरी वृत्त महाराजगञ्जका प्रहरी नायब उपरीक्षक उमेश लम्सालले बताए।
मृतकमध्ये पाँच जनाको शव लिएर बिहान आफन्त भारत उडेका छन्।
अन्य तीन जनाको शव लिएर आफन्त जाने तयारीमा छन्। मृतक दुई परिवारका रहेको लम्सालले बताए।
सोमबार थाहा नगरपालिका-४ सिमभञ्ज्याङस्थित रिसोर्टमा बसेका भारतीय पर्यटक मंगलबार बिहान अचेत अवस्थामा भेटिएका थिए।
उनीहरूलाई हेलिकप्टरमा काठमाडौं ल्याइएकोमा मृत्यु भएको थियो। मृतकहरू भारत केरलाका हुन्।
मृत्यु हुनेमा ३८ वर्षीय रन्जित कप, ३४ वर्षीया इन्द्र, ३७ वर्षीय प्रवीण, ३२ वर्षीया सरिया, ५ वर्षीय अभि, ७ वर्षीया अर्चना, ५ वर्षीय वैशनव र ९ वर्षीया बन्द्रा थिए।
मृतकहरूको शव पोस्टमार्टमका लागि त्रिवि शिक्षण अस्पतालमा राखिएको थियो।
पोस्टमार्टमपछि कानुनी प्रक्रिया मिलाएर दूतावास र प्रहरीले आफन्तको जिम्मा लगाएको हो।
