अख्तियार दुरूपयोग अनुसन्धान आयोगले गुठी संस्थान त्रिपुरेश्वर, काठमाडौंका प्रमुख प्रशासक र उप-प्रशासकविरूद्ध विशेष अदालत काठमाडौंमा मुद्दा दायर गरेको छ।
प्रमुख प्रशासक नारायण चौधरी र उपप्रशासक जयप्रसाद रेग्मीले आठ लाख घुस लिएको भन्दै अख्तियारले उनीहरूविरूद्ध मंगलबार विशेष अदालतमा मुद्दा दायर गरेको हो।
उनीहरूले काठमाडौं महानगरपालिका-१ मा रहेको गुठीको जग्गा उसकै नाममा गरिदिने भन्दै घुस लिएको र पछि फिर्ता गरेको सूचनाका आधारमा अनुसन्धान गरेको अख्तियारले जनाएको छ।
सोही सूचनाका आधारमा अख्तियार कार्यालय टंगालबाट खटिएको टोलीले केही समयअघि चौधरी र रेग्मीलाई नियन्त्रणमा लिएको थियो।
उनीहरूले घुस लिएको स-प्रमाण पुष्टि भएपछि आयोगले मुद्दा दायर गरेको हो।
साथै, आठ लाख बिगो रकम कायम गरी थप सजाय समेत हुन मागदाबी गरेको छ।
