बुटवल तथा आसपासको क्षेत्रमा मोटरसाइकल र स्कुटर चोरीमा संलग्न एक समूहलाई प्रहरीले पक्राउ गरेको छ।
इलाका प्रहरी कार्यालय बुटवलले बुटवल तथा तिलोत्तमाका विभिन्न क्षेत्रबाट मोटरसाइकल र स्कुटर चोरी गर्दै आएको ६ जनाको समूहलाई पक्राउ गरेको हो। पक्राउ गरेकाहरुलाई मंगलबार पत्रकार सम्मेलन गरी प्रहरीले सार्वजनिक गरेको छ।
ईलाका प्रहरी कार्यालय बुटवलका प्रमुख प्रहरी नायव उपरीक्षक भिमलाल भट्टराईका अनुसार सोमबार बुटवल ११ देविनगरमा रहेको लुम्बिनी आयूर्वेद अस्पताल अगाडिबाट मोटरसाइकल चोरी गर्दै गर्दा उक्त समूहलाई पक्राउ गरिएको हो।
यसरी पक्राउ पर्नेमा रुपन्देही सैनामैना र देवदहका युवा छन्।सैनामैना नगरपालिका वडा नं. १ का २६ वर्षीय दिपक थापा, २२ वर्षीय सुजन थापा र २५ वर्षीय जीवन पुन पक्राउ परेका छन्।
त्यस्तै अन्यमा देवदह नगरपालिका वडा नं. ११ का २५ वर्षीय धर्मेन्द्र कहार, ३३ वर्षीय लक्ष्मण गिरी र ३६ वर्षीय धर्मेन्द्र चमार छन्। पक्राउ परेका उनीहरुलाई चोरी मुद्दा अन्तर्गत मुद्दा चलाइने प्रहरी नायब उपरीक्षक भट्टराईले जानकारी दिए।
उक्त समूहबाट लुम्बिनी प्रादेशिक अस्पताल बुटवल, तिलोत्तमा तथा बुटवलका अन्य स्थानबाट चोरी गरेका ५ वटा मोटरसाइकल तथा स्कुटर बरामद गरिएको उनले बताए।