चीनको वुहानबाट १ सय ७५ जना नेपालीलाई काठमाडौं ल्याएको नेपाल एयरलाइन्सको वाइडबडी जहाजको मंगलबारको दोहा उडान रद्द भएको छ।
नेपाल एयरलाइन्सका एक कर्मचारीका अनुसार जहाजको ४८ घन्टे क्वारेन्टाइन अवधि सकिए पनि 'डिप क्लिनिङ' को काम नसकिएपछि मंगलबार राति साढे दस बजेका लागि तय भएको दोहा उडान रद्द भएको हो।
दोहा उडान रद्द भएपछि जहाज बुधबार दिउँसो दुई बजे दिल्ली उड्नेछ। क्वारेन्टाइन अवधि सकिएपछि जाहजलाई मज्जाले सफा गर्ने, सिटका कपडा अर्को हाल्ने काम भइरहेको छ।
कोरोना भाइरसको उद्गमस्थल वुहानबाट नेपालीलाई उद्दार गरेर ल्याएपछि जहाजलाई पनि ४८ घन्टा क्वारेन्टाइनमा राखिएको थियो। जहाजको क्वारेन्टाइन अवधि मंगलबार बिहान सकिएको हो।
जहाजलाई 'रिमोर्ट पार्किङ बे' मा राखिएको छ।
वुहानबाट नेपाली लिएर जहाज आइतबार बिहान ३ बजेर २२ मिनेटमा त्रिभुवन अन्तर्राष्ट्रिय विमानस्थलमा अवतरण गरेको थियो।
जहाजका पाइलटसहित सबै सदस्यलाई क्वारेन्टाइनका लागि चाँगुनारायण नगरपालिकास्थित नगरकोटको खानेपानी तालिम केन्द्रमा राखिएको छ।
उद्दार गरेर ल्याइएका नेपालीलाई भने खरिपाटीस्थित विद्युत प्राधिकरणको तालिम केन्द्र भवनमा राखिएको छ।
