भारतमा एउटै गोत्रका केटासँग लुकिछिपी विवाह गरेको भन्दै एक परिवारले आफ्नै छोरीको हत्या गरेको छ।
पूर्वी दिल्लीकी २५ वर्षीया शितल चौधरीको हत्यापछि उत्तरप्रदेशस्थित अलिग्रहको एक नहरमा शव फालिएकाे थियो।
शितल चौधरी र उनका श्रीमान अंकित भाती एउटै गोत्रका थिए। उनीहरुले परिवारको असहमतिका वावजुत गत अक्टोबरमा लुकीछिपी विवाह गरेका थिए।
दम्पत्तिले विवाह गरेकोबारे गत जनवरी २० तारिखमा आ–आफ्ना परिवारलाई जानकारी गराएकाे थियाे।
शितलको परिवारले आफ्नी छोरीको हत्या गरेपछि तीन हप्तासम्म लुकाएर राखेको थियो। पछि शितलका श्रीमानले फेब्रुअरी १८ तारिखमा हराएको वा अपहरण भएको भन्दै प्रहरीमा उजुरी दिएका थिए।
उजुरीको तीन दिनपछि गत शुक्रबार प्रहरीले शितलका बुबा–आमा सहित छ जनालाई पक्राउ गरेको हाे। हाल प्रहरीले परिवारलाई पक्राउ गरी १४ दिन हिरासतमा राखी थप अनुसन्धान गर्न अदालतसँग अनुमति लिएको टाईम्स अफ ईण्डियाले जनाएको छ।
शितलको शव र उनले प्रयोग गरेका सामान गत जनवरी ३० तारिखमा अलिग्रहको नहरमा भेटिएको थियो। हत्या गरेकै दिन शितलको परिवार दिल्ली फर्केको थियो।
प्रहरीले शितलको शव गत जनवरी ३० तारिखमा भेटाएर फेब्रुअरी २ तारिख सम्म शवगृहमा राखेको थियो। कसैले उनको शव पहिचान गर्न नसकेपछि प्रहरीले उनको कपडा र प्रयोगमा आएको सामान अनुसन्धानका लागि राखेर शव जलाएको थियो।
प्रेमी अंकितले पछि कपडाबाट शितललाई पहिचान गरेका थिए।
