पोखरा महानगरपालिका २७ लेखनाथमा बाल विशेष अस्पताल बनाउन सम्झौता भएको छ।
गण्डकी प्रदेशको मुख्यमन्त्री तथा मन्त्रिपरिषदको कार्यालयमा आइतबार एक कार्यक्रमबीच पोखरा महानगरका प्रमुख मानबहादुर जिसी र काठमाडौं इन्स्टिच्युट अफ चाइल्ड हेल्थका संस्थापक अध्यक्ष डा. भगवान कोइरालाले सम्झौता पत्रमा हस्ताक्षर गरेका हुन्।
गण्डकी प्रदेशका मुख्यमन्त्री पृथ्वीसुब्बा गुरुङ, मुख्य सचिव हरिप्रसाद बस्याल र महानगरका प्रमुख प्रशासकीय अधिकृत बद्रिनाथ अधिकारीको रोहवरमा सम्झौता पत्रमा हस्ताक्षर भएको हो।
डा. कोइरालाले सातवटै प्रदेशमा विशिष्टिकृत बाल स्वास्थ्य सेवा प्रदान गर्न र बाल स्वास्थ्यसम्बन्धी अनुसन्धान गर्न अस्पताल बनाउने घोषणा अनुसार पोखरामा अस्पताल बनाउन लागेको बताए। सम्झौतापत्रमा पोखरा २७ लेखनाथमा महानगरको जग्गा र त्यहाँ रहेको संरचनामा बाल अस्पताल सञ्चालन गर्न दिने उल्लेख छ। उक्त स्थानमा महानगरको वडा कार्यालय रहेको छ।
सम्झौता पत्रमा महानगरको तर्फबाट पूरा गर्नुपर्ने जिम्मेवारी र काठमाडौं इन्स्टिच्युट अफ चाइल्ड हेल्थले पूरा गर्नुपर्ने जिम्मेवारी छुट्टाछुट्टै उल्लेख गरिएको छ। जसमा महानगरले आफ्नो नाममा रहेको कित्ता नं. ३५८, ३५९ र कि.नं. ३९७ मा रहेको कुल ३७ रोपनी जग्गा र त्यहाँ रहेको संरचनासहित काठमाडौं इन्स्टिच्युट अफ चाइल्ड हेल्थलाई बाल अस्पताल सञ्चालनका लागि ३० वर्षका लागि नि:शुल्क उपलब्ध गराउने उल्लेख छ।
यस्तै, अस्पताल बनाउन आवश्यक स्रोत जुटाउन समन्वय र सहयोग गर्ने, अस्पतालको सेवा गरिबीमा रहेका तथा सीमान्तकृत वर्गको पहुँचमा पुर्याउन आवश्यक स्रोतका लागि महानगरपालिकाको स्रोत छुट्याउने, प्रदेश सरकारसँग समन्वय गर्ने तथा नेपाल सरकारका बीमा लगायतका योजनासँग जोड्ने तथा अन्य स्रोतका लागि आवश्यक पहल गर्ने, अस्पताल निर्माण तथा सञ्चालनका निमित्त अन्य आवश्यक सबै प्रकारका सहयोग तथा सहजीकरण गर्ने, हाल महानगरपालिकाको वडा कार्यालय सञ्चालनमा रहेको भवनलाई तत्कालै पुनर्निर्माण गरी सोही भवनबाट वडा कार्यालय तथा बाल अस्पताल सेवा समेत सञ्चालनमा ल्याउन पहल उल्लेख छ।
यस्तै, काठमाडौं इन्स्टिच्युट अफ चाइल्ड हेल्थले पूरा गर्नुपर्ने जिम्मेवारीमा अस्पताल सञ्चालन तथा व्यवस्थापनका लागि प्रदेश स्तरीय समिति बनाउने र उक्त समितिमा प्रदेश तथा स्थानीय सरकारको प्रतिनिधित्व सुनिश्चित गर्ने, अस्पताल निर्माण गर्न आवश्यक विस्तृत डिजाइन तयार गराउने, उपलब्ध भवन तथा जग्गामा अस्पतालका लागि आवश्यक संरचना पुनर्निर्माण तथा नयाँ निर्माण गर्ने, अस्पताल सञ्चालन गर्न आवश्यक उपकरण, प्रविधि, प्राविधिक तथा अन्य जनशक्तिको व्यवस्थापन गर्ने उल्लेख छ।
यस्तै, अस्पतालको सेवालाई काठमाडौं इन्स्टिच्युट अफ चाइल्ड हेल्थ केन्द्रीय अस्पतालसँग जोड्ने, टेलिमेडिसिन तथा पृष्ठपोषणसहितको प्रेषण सेवा सञ्चालन गर्ने, स्वास्थ्यसम्बन्धी अनुसन्धान गर्ने र प्राप्त उपयोगी नतिजाहरू महानगरपालिकाको स्वास्थ्य शाखालाई समेत उपलब्ध गराउने, महानगरपालिकालाई मासिक रूपमा स्वास्थ्य सेवा उपयोगको प्रतिवेदन तथा वार्षिक रूपमा प्रगति तथा आर्थिक प्रतिवेदन बुझाउने उल्लेख छ।
सम्झौता पत्रमा कानुनअनुसार लिनुपर्ने अनुमति सम्बन्धित निकायहरूबाट लिने, प्राप्त जग्गा तथा संरचना यस सम्झौतामा अस्पतालको उद्धेश्य परिपूर्ति हुने बाहेकका काम बााहेक अरु प्रयोजनका लागि उपयोग नगराउने, प्राप्त जग्गा तथा संरचना नेपाल सरकार, प्रदेश तथा स्थानीय सरकारको प्रचलित कानुन, नीति निर्देशन बमोजिम उपयोग गर्ने, पोखरा महानगरपालिकाको शिशुवा अस्पताल सञ्चालन, व्यवस्थापन र सुदृढीकरणमा सहकार्य गर्ने जिम्मेवारी पनि काठमाडौं इन्स्टिच्युट अफ चाइल्ड हेल्थले पूरा गर्नुपर्ने उल्लेख छ।
अस्पताल सञ्चालन तथा पूर्वाधार निर्माणका लागि स्रोत जुटाउन तथा अन्य आवश्यक समन्वय र सहयोग गर्न पोखरा महानगरका प्रमुख, गण्डकी सरकारको सामाजिक विकास मन्त्रालयका सचिव र प्रदेशका लब्ध प्रतिष्ठित व्यक्ति समेत रहने गरी सल्लाहकार समिति गठन गर्ने उल्लेख छ।
सम्झौताको अन्त्यमा दुवै पक्षको सहमतिमा आवश्यकता अनुसार सम्झौता अवधि थप गर्न सकिने उल्लेख गरेको छ।
सम्झौता पत्रमा हस्ताक्षरपश्चात मुख्यमन्त्री गुरुङले गण्डकी प्रदेश सरकारले बाल, मुटु र मिर्गौलाको विशिष्ट अस्पताल खोल्ने प्रदेश सरकारको योजना नै रहेको बताए।
आफूले मुख्यमन्त्रीको सपथ लिए लगत्तै डा. कोइरालालाई भेटेर गण्डकी प्रदेशमा अस्पताल खोल्न आग्रह गरेको भन्दै उनले अरु पनि विशिष्टिकृत अस्पताल खोल्ने प्रदेश सरकारको नीति रहेको बताए।
पोखरा महानगरका प्रमुख मानबहादुर जिसीले अस्पतालको सेवा यसै आर्थिक वर्षदेखि सञ्चालनमा ल्याउने बताए।
यस्तै, डा. कोइरालाले अस्पताल सुरूमा ५० बेडको बनाउने र पछि १०० बेडमा विस्तार गर्ने योजना रहेको बताए।
महानगरले दिएको जग्गामा विस्तृत सर्वे गरेर योजना बनाउन ३ महिना समय लाग्ने भन्दै उनले त्यसपछि अस्पतालबारे विस्तृत विवरण सार्वजनिक गर्ने बताए।
अस्पताल बनाउन ४० देखि ५० करोड लाग्ने अनुमान रहेको भन्दै उनले पोखरामा स्थापित अस्पतालबाट हुने आम्दानी अन्यत्र खर्च नगर्ने र गण्डकी प्रदेशमै लगानी गर्ने बताए।