एक सातामा विश्वमा कोरोना भाइरस संक्रमितको संख्या दुई गुनाले बढेको छ।
मार्च १४ मा १ लाख ५६ हजार ६ सय ५३ जना संक्रमित रहेकोमा २२ मार्चसम्म आइपुग्दा यो संख्यामा झण्डै शतप्रतिशतको वृद्धि हुँदै ३ लाख पाँच हजार ३६ भएको छ।
यो अवधिमा कुल १ लाख ४८ हजार ३ सय ८३ जना नयाँ संक्रमित थपिएका छन्।
पछिल्लो समय कोरोना भाइरसको संक्रमण यसको उद्गमस्थल चीनमा कम हुँदै गएपनि युरोप र अमेरिकामा उल्लेख्य संख्यामा बढ्दै गएको छ।
यसको संक्रमणबाट पछिल्लो समय सबैभन्दा बढी इटाली प्रभावित बनेको छ। पछिल्लो आँकडा अनुसार इटालीमा ५३ हजार ५ सय ७८ जनामा यसको संक्रमण भेटिएको छ भने इटालीमा ४ हजार ८ सय २५ जनाको मृत्यु भइसकेको छ।
यसैगरी अमेरिकामा २६ हजार ८६३ जना संक्रमित छन् भने ३४८ जनाले ज्यान गुमाइसकेका छन्।
यसैगरी १३ सय ८१ जनाको ज्यान गएको स्पेनमा २५ हजार ४ सय ९६ जनामा यसको संक्रमण पुष्टि भएको छ।
त्यसैगरी जर्मनीमा २२ हजार ३ सय ६४ जना संक्रमित भएका छन् भने ८४ जनाको मृत्यु भएको छ।
