भारतले ‘जनता कर्फ्यू’ लगाएका कारण पूर्वको प्रमुख नाका काँकडभित्ता ठप्प भएको छ। सीमा पूरै सुनसान बनेको छ भने यात्रु नभएर छोटो दूरीका यातायातसमेत ठप्प भएका छन्।
आइतबार बिहानदेखि भारत सरकारले आफ्नो देशमा जनता कर्फ्यू लगाउँदा हवाई, रेल तथा स्थल यातायात बन्द भएको कारण सीमामा आवतजावत ठप्प बनेको ट्राभल्स संघ झापाका अध्यक्ष नेत्र कार्की बताए।
कोरोना भाइरस फैलिने सन्त्रास बढेको बेला भारतको कर्फ्यूले नाका ठप्प हुँदा नेपाललाई फाइदा नै पुगेको उनको धारणा छ। कार्कीका अनुसार भारतबाट यात्रु आउने क्रम रोकिएको छ। काँकडभित्ता नाकामा नेपाली सुरक्षाकर्मीले पनि कडाइ गरेको पाइएको उनले बताए।
नेपाली सुरक्षाकर्मीले भारततिर अनावश्यकरुपमा जाने र नाकामा रमिता हेर्न आउनेलाई फर्काएर राम्रो गरेको उनको भनाइ छ।
प्रमुख जिल्ला अधिकारी उदयबहादुर रानाले नाकामा नेपालले बन्द नगरेको तर भारतमा लगाइएको ‘जनता कर्फ्यू’ले ओहोरदोहोर ठप्प बनेको जानकारी आएको बताए। नाका बन्द गर्ने विषय संघीय सरकारको क्षेत्राधिकारभित्र भएको जनाउँदै हालसम्म केन्द्रबाट त्यस्तो बन्दको निर्देशन नआएको उनले बताए।
नागरिक यातायात प्रालिका सञ्चालक राम थापाले यात्रु घटेकाले बस सेवा कटौती गरिएको जनाउँदै १५ वटामध्ये आज पाँच वटा मात्र छोटो दूरीमा चलाइएको उनले जानकारी दिए। चलाइएका बसमा समेत यात्रु नभएर खाली कुदाउनु पर्दा ठूलो घाटा व्यहोर्नु परिरहेको उनले बताए।
काँकडभित्तासँग सीमा जोडिएको भारतको पानीट्याङ्की नाकाका खटिएका पश्चिम बंगाल प्रहरीका सहायक निरीक्षक किशोर क्षेत्रीले सीमावर्ती बजार र गाउँ ‘जनता कर्फ्यू’का कारण पूरै बन्द रहेको बताए।
बजार, यातायातलगायत सबै बन्द रहेको र सर्वसाधारण घरभित्रै बसेको हुँदा नाकामा ओहोरदोहोर ठप्प रहेको उनको भनाइ छ।
छिमेकी मुलुक भारतमा कोरोना भाइरसको संक्रमण फैलिएका कारण सीमानाका नेपाल सरकारले अविलम्ब बन्द गरे संक्रमण भित्रिने जोखिम कम हुने भन्दै सीमा क्षेत्रका बासिन्दाले माग गर्दै आएका छन्।
मेचीनगर नगरपालिकाका प्रमुख विमल आचार्यले समेत नाकालाई सरकारले बन्द गर्नुपर्ने अवस्था भइसकेको बताए। उनले प्रदेश नम्बर १ सरकारलाई मेचीनगर नगरपालिकाका तर्फबाट काँकडभित्ता नाका बन्द गराइदिन ध्यानाकर्षण गराइसकेको बताए।
