डाक्टरहरू भन्छन्- हामीले एकअर्काबीच भौतिक दूरी कायम गर्यौं भने कोरोना भाइरसको संक्रमणलाई कम गर्न सकिन्छ। धेरै मानिसलाई यसले कसरी कोरोना भाइरसको संक्रमण रोक्छ होला र भन्ने पत्यार लाग्दैन।
तर भारतको नयाँदिल्लीको एउटा केसलाई हेर्नुभयो भने कोरोना कसरी तीव्र गतिमा फैलिन्छ भन्ने छर्लंग हुन्छ।
नयाँ दिल्लीमा अहिले ३० जनामा कोरोना भाइरस देखिएको छ। तीमध्ये ५ जनामा एउटै बिरामीबाट यो भाइरस सरेको हो।
टाइम्स अफ इन्डियाले दिल्लीको केस नम्बर १० की ती महिलाबाट कसरी अरूमा कोरोना सर्यो भन्ने रेकर्ड छापेको छ। फेब्रुअरी १९ मा ती महिला आफ्नो १९ वर्षका छोरासँग साउदी अरब गइन्। मार्च १०मा उनीहरू दिल्ली फर्किँदा ती महिलाका भाइ विमानस्थलमा लिन गए। मार्च १२ मा रूघाखोकी र ज्वरो आएपछि ती महिला स्थानीय डाक्टरकोमा गइन्।
मार्च १५ मा उनलाई धेरै नै अप्ठेरो भएपछि गाडीमा राखेर गुरू टेघबहादुर अस्पतालको आकस्मिक कक्षमा लगियो। त्यहाँका डाक्टरले उनलाई रामबहादुर लोहिया अस्पतालमा रिफर गरिदिए। मार्च १७ मा उनलाई कोरोना भाइरस भएको पुष्टि भयो।
मार्च २० मा उनका आमा र भाइलाई पनि कोरोना ‘पोजेटिभ’ देखियो। अर्को दिन उनकी २४ र २६ वर्षकी दुई छोरीलाई पनि कोरोना भाइरस भएको पुष्टि भयो।
मार्च २२ मा त उनलाई सुरूमा जाँच्ने ती स्थानीय डाक्टरलाई पनि कोरोना देखियो। यसरी १० दिनको अन्तरालमा एक महिलाबाट पाँच जनामा कोरोना फैलियो।
अहिले ती डाक्टरका श्रीमती र छोरीलाई पनि कोरोनाको जोखिम बढेको छ। उनीसँगै साउदी अरब गएका ती महिलाका छोरालाई अहिलेसम्म कोरोना देखिएको छैन तर उनी आइसोलेसनमा बसेका छन्।
उनको घर नजिकैका ७४ जना मानिसलाई पनि अधिकारीहरू सुक्ष्म निगरानी गरिरहेका छन्।
उनका भाइले त झन् भीडभाड हुने ठाउँमा गएर एक सयभन्दा बढी मानिससँग सम्पर्क गरिसकेका छन्।
ती महिला सुरूमा जचाउँन गएका डाक्टरले पनि आफूमा कोरोना देखिनुअघि अरू धेरै बिरामीलाई जाँचेका छन्।
ती डाक्टर मोहनपुरी मोहल्ला क्लिनिकमा पनि काम गर्थे। त्यहाँ पनि उनले धेरै बिरामी जाँचेका छन्। स्थानीय अधिकारीहरूले अहिले ती सबै बिरामीको खोजी गरिरहेका छन्।