स्पेनमा कोरोना भाइरसको संक्रमणबाट ज्यान गुमाउनेको संख्या चीनको भन्दा बढी भएको छ।।
२४ घण्टामा थप ७ सय ३८ जनाको संक्रमणबाट मृत्यु भएपछि उसको मृतक संख्या चीनको भन्दा बढी भएको हो।
संक्रमणबाट हालसम्म स्पेनमा ३ हजार ४ सय ३४ जनाको ज्यान गइसकेको रोयटर्सले जनाएको छ।
चीनमा कोरोना भाइरसको संक्रमणबाट हालसम्म ३ हजार २ सय ८७ जनाको ज्यान गएको तथ्यांक छ।
पछिल्लो समय चीनमा संक्रमणदर र मृत्युदर दुबैमा भारी गिरावट आएको छ। त्यहाँ पछिल्लो २४ घण्टामा ६ जनाको मात्र मृत्यु भएको छ भने ६७ जना नयाँ संक्रमित भेटिएका छन्।
स्पेनमा संक्रमण दर पनि बढेको छ। त्यहाँ हालसम्म ४७ हजार ६ सय १० जनालाई कोरोना भाइरसको संक्रमण पुष्टि भइसकेको छ।
यसैगरी स्पेनमा १ लाख ३७ हजार जना कामदारले भाइरससँग सम्बन्धित शीर्षकमा विरामी बिदा लिएकाले यो संख्या अझै बढ्न सक्ने जनाइएको छ। यसरी बिदा लिएका कतिपय सुरक्षात्मक एकान्तबासमा गएका छन्।
स्पेन संक्रमणबाट सर्वाधिक प्रभावित हुने इटालीपछिको दोश्रो युरोपेली मुलुक बनेको छ। इटालीमा हालसम्म संक्रमणबाट ६ हजार ८ सय २० जनाको मृत्यु भइसकेको छ।
मृतक संख्यामा चीनलाई उछिनेको स्पेनका उपप्रधानमन्त्रीमा कारमेन काल्भोलाई पनि कोरोना भाइरसको संक्रमण भएको छ। उनी संक्रमणबाट प्रभावित बन्ने मन्त्रीपरिषदका तेश्रा सदस्य हुन्।
यसैगरी बुधबार अबेर राती बसेको त्यहाँको मन्त्रीपरिषद् बैठकले विपक्षी पार्टीको समर्थनमा १५ दिनको राष्ट्रिय संकटकाललाई ३० दिन लम्ब्याउने निर्णय गरेको छ। यस अन्तरगत स्कूल, रेष्टिरेन्ट तथा अधिकाशं पसलहरू बन्द हुनेछन्।
मार्च १४ देखि स्पेन लकडाउनमा रहँदै आएको छ।
