लकडाउनको कार्यान्वयन नभएपछि स्थानीयवासीले गाउँको मुख्य सडक नै बन्द गरेका छन्। महोत्तरी गौशाला नगरपालिका वडा नं. २ का स्थानीयवासीले लकडाउनको कार्यान्वयनको लागि आज बिहानै सडकको विभिन्न भागमा घेरेका छन्।
गाउँमा आवतजावत बन्द नभएपछि बाध्य भई आफूहरूले सडक नै बन्द गरेको स्थानीय करण महतोले बताए।
विश्वभरि महामारीको रूपमा फैलिँदै गइरहेको कोरोना भाइरस (कोभिड १९) को संक्रमणबाट बच्न नेपाल सरकारले चैत ११ गतेदेखि चैत १८ गतेसम्म देशभरि लकडाउन गरेको छ।
नेपालमा हालसम्म तीन जना कोरोना संक्रमित व्यक्ति भेटिएकोले लकडाउनमा सरकारले कडाइ गरेको छ।
लकडाउनको उल्लंघन गर्नेहरूलाई प्रहरीले पक्राउ गरिरहेको छ भने सयौं सवारी साधनलाई समेत नियन्त्रणमा लिएको हो।
लकडाउनको उल्लंघन गरेपछि अहिले प्रदेश २ को सबै जिल्लामा नेपाली सेना समेत परिचालन गरिएको छ।