डोटीका नौ वटै स्थानीय तहले रोजगारी गरेर भारतबाट फर्किएका व्यक्तिको सूचना संकलन गर्न सुरु गरेको छ।
पछिल्लो एक महिनामा भारतबाट काम गरेर गाउँ फर्किएका व्यक्तिको लगत संकलन सुरु गरिएको सुदूरपश्चिम गाउँपालिका महासंघका अध्यक्ष दुर्गादत्त ओझाले बताए।
'एक महिनामा भारतबाट कति फर्किए त्यसको लगत संकलन सुरु गरेका छौँ,' उनले भने।
यहाँका नौ वटै स्थानीय तहका जनप्रतिनिधिसहित स्वास्थ्यकर्मीको टोलीले आ–आफ्नो पालिका तथा वडामा लगत संकलनका लागि कर्मचारी परिचालन गरिरहेको छ।
भाइरस संक्रमणको जोखिम नहोस् भनेर पछिल्लो एक महिनामा भारतबाट फर्किएका व्यक्तिको विवरण संकलन गर्न थालिएको सायल गाउँपालिकाका अध्यक्ष तेजबहादुर डुम्रेलले बताए।
यहाँका स्थानीय तहले पछिल्लो एक महिनाको अवधिमा भारतलगायत अन्य देशबाट कोही आएको तथा आएर फर्किएको भएमा त्यसको सूचना पनि नगरपालिका/गाउँपालिकाको कार्यालय वा प्रहरी कार्यालयमा जानकारी दिन आह्वान गरेको छ।
जिल्लामा अन्य देशभन्दा पनि रोजगारीका लागि भारत जानेको संख्या बढी रहेको पाइन्छ।
