गैरआवासीय नेपाली संघ दक्षिण कोरियाले कोरोना भाइरस संक्रमण भए/नभएको जाँच गर्न प्रयोग हुने दुई हजार कीट नेपाल सरकारलाई तत्काल सहयोग गर्ने भएको छ।
योजनानुरुप किट्स प्रदान गर्ने कम्पनी डोगेनसँग पनि दुई हजार प्रति कीटको सम्झौता भएको एनआरएन कोरियाले जनाएको छ।
सोका लागि एनआरएन कोरियाले यहाँ रहेका नेपालीसँग सहयोग संकलन अभियानसमेत थालेको छ। प्रति कीट बीस हजार कोरियाली वन (रु दुई हजार) पर्ने भएकाले दुई हजार कीट लागि ४० लाख रुपैयाँ लाग्ने अनुमान छ।
कोरियामा रहेका नेपालीमा प्रति व्यक्ति एक कीट बराबर रकम सहयोग गर्न एनआरएन कोरियाका अध्यक्ष यज्ञराज सुवेदीले आग्रह गरेका छन्।
'यतिबेला मातृभूमि नेपालले कोरोना भाइरसका कारण जुन विषम परिस्थिति भोग्नुपरेको छ, त्यसका लागि सहयोग गर्न सम्पूर्ण कोरियावासी नेपालीहरूमा अनुरोध गर्दछु,' उनले भने।
उक्त कीट कोभिड– १९ को संक्रमणको शंका भएका बिरामीमा हो/हैन भन्ने पुष्टि गर्न प्रयोग हुन्छ। कीटमा बिरामीको र्याल राखेर स्क्यान मेशिनमा स्क्यान गरिएपछि तीन घण्टामै कोभिड बिरामी हो वा हैन भन्ने पत्ता लाग्छ।
बिहीबार दिनभर सहयोग संकलन गरेर शुक्रबार कार्गोमार्फत उक्त कीट चीन पठाइने र चीनबाट नेपाल सरकारको सम्बन्धित निकायले शुक्रबार नै नेपाल पुर्याउने तयारी भएकोसमेत अध्यक्ष सुवेदीले बताए।
दक्षिण कोरियामा झण्डै ६० हजार नेपाली विभिन्न स्थानमा बसोबास गर्छन्। हालसम्म यहाँ रहेका नेपाली कोरोना संक्रमण हुनबाट सुरक्षित छन्।
