भारतका विभिन्न स्थानबाट फर्कने क्रममा रुपन्देही बेलहिया नाकामा अलपत्र परेका २९ जनालाई उद्धार गरी क्वारेन्टाइनमा पठाइएको छ।
कोरोनाको संक्रमण फैलिन नदिन सरकारले घोषणा गरेको लकडाउनका कारण बुधबार बिहानै बेलहिया सीमापारि आए पनि बिहीबार मात्रै उनीहरुलाई वारि ल्याइएको हो।
रुपन्देहीका विभिन्न तीन वटा क्वारेन्टाइनमा उनीहरुलाई पठाइएको छ। १४ दिन क्वारेन्टाइनमा राखेपछि मात्रै घर पठाइनेछ।
रुपन्देहीका प्रमुख जिल्ला अधिकारी महादेव पन्तका अनुसार उद्धार गरिएका २९ मध्ये १० लाई शंकरनगर, ११ लाई सुद्धोधन गाउँपालिका र ८ जनालाई सियारीमा रहेका क्वारेन्टाईनमा पठाइएको छ। क्वारेन्टाईनमा पठाइएकाहरुमा रुपन्देहीका १४, झापाका ११ र बर्दियाका ५ जना छन्।
यस्तै भारतबाट आएका कैलालीका तीन जना पनि रुपन्देहीका क्वारेन्टाइनमा रहेको प्रमुख जिल्ला अधिकारी पन्तले जानकारी दिए। योसँगै रुपन्देहीमा क्वारेन्टाइनमा रहनेहरुको संख्या ३२ पुगेको छ।
भारतमा कोरोना संक्रमण फैलिँदै जान थालेपछि भारतको दिल्ली, लखनउ, मुम्बई, अहमदावाद लगायतका स्थानमा काम गर्दै आएका उनीहरु नेपाल आएका हुन्।
भारतमा समेत २१ दिनको लकडाउन घोषणा गरिएको कारण रेल तथा बस यातायात सबै बन्द भएपछि उनीहरु मालबाहक ट्रक, एम्बुलेन्स, पत्रिका बोक्ने गाडी लगायतमा सुनौलीसम्म आएका थिए।
