कोरोनाभाइरसको संक्रमण रोकथाम तथा नियन्त्रणका लागि तिलोत्तमा नगरपालिकाले स्थापना गरेको विशेष राहत कोषमा रकम जम्मा गर्ने अभियान तीव्र बनेको छ।
उक्त राहत कोषका नगरपालिका स्वास्थ्य शाखा अन्तर्गतका कर्मचारीले राहत रकम जम्मा गर्ने घोषणा गरेका छन्। स्वास्थ्य शाखामा कार्यरत सिनियर अहेव अधिकृतद्वय गणेश गौतम र ईश्वरी पौडेलले राहत कोषमा २५/२५ हजार रकम प्रदान गर्ने घोषणा गरेका छन्।
त्यस्तै आनन्दवन स्वास्थ्य चौकीका इन्चार्ज एवं जनस्वास्थ्य निरीक्षक ज्ञानप्रसाद पौडेल र गंगोलिया स्वास्थ्य चौकीका इन्चार्ज लिलाधर घिमिरेले पनि नगरपालिकाको राहत कोषमा २५/२५ हजार रकम प्रदान गर्ने घोषणा गरेका छन्।
यस्तै, उक्त राहत कोषमा होराइजन गौतमबुद्ध मावि तिलोत्तमाले १ लाख १ हजार आर्थिक सहयोग गरेको छ।
त्यसैगरी, तिलोत्तमास्थित सामूहिक विकास बचत तथा ऋण सहकारी संस्थाले पनि नगरपालिका र प्रदेश सरकारले स्थापना गरेका विपद् व्यवस्थापन कोषमा आर्थिक सहयोग गरेको छ।
संस्थाले तिलोत्तमा नगरपालिकालाई १ लाख र प्रदेश ५ सरकारको विपद् व्यवस्थापन कोषमा २ लाख रुपैयाँ प्रदान गर्ने जनाएको छ।
यस्तै, जनउत्थान बचत तथा ऋण सहकारी संस्था तिलोत्तमाले पनि विभिन्न पालिकाहरुले स्थापना गरेका विपद् व्यवस्थापन कोषमा दुई लाख रुपैयाँ प्रदान गरेको छ।
संस्थाले तिलोत्तमा नगरपालिका, सिद्धार्थनगर नगरपालिका तथा सियारी र ओमसतिया गाउँपालिकाले सञ्चालन गरेको कोषमा ५०/५० हजार रुपैयाँ सहयोग गरेको जनाएको छ।
तिलोत्तमा नगरपालिकाले स्थापना गरेको कोषमा अहिले १ करोड बढी रकम जम्मा भइसकेको नगरपालिकाले जनाएको छ।
तिलोत्तमा नगरपालिकाले कोरोना भाइरसको रोकथाम र नियन्त्रणका लागि जम्मा हुने रकममा एकद्वार नीति अपनाएको छ।
अरु कसैलाई पनि रकम संकलन गर्ने उद्देश्यले कोष खडा नगर्न आग्रह गरिएको नगर प्रमुख वासुदेव घिमिरेले बताए।