भक्तपुरबाट रामेछापतर्फ जाँदै गरेको जीप दुर्घटना हुँदा दुई जनाको मृत्यु भएको छ।
मंगलबार बिहान ५ बजे सूर्यविनायकबाट रामेछापतर्फ जाँदै गरेको बा १४ च ९४९८ पिकअप बोलेरो जीप खाँडादेवी गाउँपालिका-१ मा दुर्घटना भएको हो।
जीप सडकबाट डेढ सय मिटर तल खस्दा ३० जना घाइते भएका छन्।
त्यसमध्ये २५ जनाको उपचार धुलिखेल अस्पतालमा भइरहेको छ भने पाँच जनालाई शिर मेमोरियल अस्पतालमा पठाइएको छ।
शिर मेमोरियल अस्पतालमा उपचाररत दोरम्बा गाउँपालिका-३ का ४० वर्षीय गोपीलाल पहरीको र धुलिखेल अस्पतालमा उपचाररत सोही गाँउपालिका-२ वर्ष २५ की संगीता पहरीको मृत्यु भएको हो।
उक्त जीपमा ३३ जना सवार रहेको जिल्ला प्रहरी कार्यालयका इन्स्पेक्टर टेकेन्द्र शर्मा पौडेलले जानकारी दिए।
'काठमाडौंबाट घर फर्कंदै गरेका रहेछन्,'उनले भने,'भित्र तीन जना बाहिर ३० जना गरी ३३ जना सवार थिए त्यसमध्ये दुईको उपचारका क्रममा मृत्यु भयो।'
सवारी चालकलाई प्रहरीले नियन्त्रणमा लिएको छ।
'चालकलाई नियन्त्रणमा लिएका छौं,'इन्स्पेक्टर पौडेलले भने,'उनीहरूले अब पास बोकेर आएका थिए कि के हो भन्ने अनुसन्धान पछि थाहा होला।'
दोरम्बा गाउँपालिका-२ सिस्नेरी बस्ने चालक वुद्ध मुस्कानको निधारमा समान्य चोट लागेको छ।
