गोरखाको सिरानचोक गाउँपालिकाले एम्बुलेन्स चालकलाई व्यक्तिगत सुरक्षाका लागि आवश्यक पर्ने सामग्री पिपिई उपलब्ध गराएको छ।
संभावित कोरोनाभाइरस संक्रमित विरामीलाई उपचारका लागि अस्पतालसम्म पुर्याउँदा आइपर्ने जोखिमबाट जोगिन भन्दै गाउँपालिकाले एम्बुलेन्स चालहरूलाई पिपिईलगायत सामग्री उपलब्ध गराएको हो।
गाउँ-गाउँमा ज्वरो, रूघाखोकी लागेका विरामीलाई अस्पताल लैजान एम्बुलेन्स चालकलाई खबर गरे पनि कोरोना त्रासले गर्दा उनीहरू एम्बुलेन्स चलाउँदैनन्। यस्ता गुनासा आएपछि गाउँपालिकाले आवश्यक स्वास्थ्य सामग्री उपलब्ध गराएको जनाएको छ।
गाउँपालिका अध्यक्ष राजु गुरूङले सरकारी तथा विरामी बोक्ने निजी सवारी साधनका चालकलाई पिपिई उपलब्ध गराइएको जानकारी दिए।
उनका अनुसार सञ्चार सम्पर्क सहज बनाउन गाउँपालिकाभित्र रहेका प्रहरी चौकीलाई पनि सिमसहित मोबाइल फोन दिइएको छ। इलाका प्रहरी कार्यालय जौवारी, प्रहरी चौकी छोप्राक, गाँखु, हर्मी र धारापानीलाई सिमसहित मोबाइल दिइएको उनले बताए।
यस्तै कोरोना सचेतना अभियानका लागि हाते माइक पनि वितरण गरिएको उनले जानकारी दिए।