बाजुराको त्रिवेणी नगरपालिकाको वडा नम्बर ३ मा व्यापारीले वडा बाहिर जान सिफारिस लिनुपर्ने र उक्त सिफारिसवापत् सय रुपैयाँ तिर्नुपर्ने नियम लागू भएको छ।
उक्त वडाले लक डाउनका बेला अर्को ठाउँबाट सामान लिन जानेलाई सिफारिस अनिवार्य गरेको हो।
'वडाको सिफारिसबिना व्यापारीहरूलाई सामान ल्याउन दिँदैनौं,'वडा नम्बर ३का वडाध्यक्ष मीनबहादुर भण्डारीले सेतोपाटीसँग भने,'व्यापारीले लाखौंको सामान ल्याउँछन् त्यसैले हामीले त्यसबापत एक सय उठाउने गरेका हौं।'
उनका अनुसार वडाभित्रै सामान किन्दा भने त्यस्तो शुल्क लाग्दैन।
वडाले त्यसरी गैरकाननी शुल्क उठाएकोबारे नगर प्रमुख रामसिंह रावलले अनभिज्ञता व्यक्त गरेका छन्।
'मलाई पनि कुन वडाबाटचाहिँ शुल्क उठाउँदै गरेको भन्ने अपुष्ट खबर प्राप्त भएको थियो,' प्रमुख रावलले भने,'आज हामी कार्यापालिकाको बैठक बस्दै छौं। त्यस्तो केही गरेको रहेछ भने पैसा फिर्ता हुन्छ।'
