धरानस्थित बिपी कोइराला स्वास्थ्य विज्ञान प्रतिष्ठानमा सुरू गरिएको कोरोना भाइरस (कोभिड-१९) को पहिलो परीक्षणमा १२ जनाकै नतिजा नेगेटिभ आएको छ।
अस्पतालका सहप्रवक्ता डाक्टर अशोक ऐरले बुधबार आएको नतिजामा १२ जनाको नगेटिभ देखिएको सेतोपाटीलाई जानकारी दिए।
१२ जनामध्ये दुईजना महिला र बाँकी पुरुष छन्। काठमाडौंमा मात्र कोरोना परीक्षण भइरहेकोमा मंगलबारबाट धरानमा पनि परीक्षण सुरू गरिएको हो।
ऐरले आज पनि प्रयोगशालामा दुईजनाको स्वाब आएको र केही आउने क्रममा रहेकाले सबैलाई एकैचोटी परीक्षण गर्ने जनाए।
'सकेसम्म १२ वटा भएपछि एकै लटमा परीक्षण गर्ने भन्ने हो तर त्योभन्दा थोरै भएपनि गर्छौं,' उनले भने।
धरानमै कोरोना परीक्षण सुरू भएपछि प्रदेश-१ को स्वाब काठमाडौं पठाउन बन्द गरिएको छ।
पोखरामा पनि मंगलबारदेखि कोरोना परीक्षण सुरू गरिएको छ।
