सरकारले देशभर लकडाउन लागू गरेको समयमा बागलुङ जिल्लाबाट आज ३५० जना महोत्तरीमा प्रवेश गरेका छन्। बागलुङमा इँटा भट्टामा काम गर्दै आएका मजदुर गृहजिल्ला महोत्तरी आएको जिल्ला प्रहरी कार्यालयले जनाएको छ।
करिब ७ वटा सवारी साधनमा महिला, पुरुष र बालबालिका गरी ३५० जना रहेको महोत्तरीका प्रहरी उपरीक्षक श्यामकृष्ण अधिकारीले जानकारी दिए।
उनीहरुलाई महोत्तरीको माइस्थानमा सुरक्षार्थ खटेको प्रहरीको टोलीले देखेपछि रोकेको थियो। स्वास्थ्यकर्मी, चिकित्सक सहितको टोलीले शरीरको तापक्रम जाँच गर्दा अवस्था सामान्य रहेकोले होम क्वारेन्टाइनमा बस्नुपर्ने सर्तका साथ घर पठाइएको एसपी अधिकारीले बताए।
उनले भने ‘हामीसँग त्यति ठूलो संख्या राख्ने क्वारेन्टाइन छैन, स्वास्थ्य जाँच गरी घरबाहिर निस्किए कारबाही भोग्नुपर्ने भनी सचेत गराएर पठाएका छौँ।’
७ वटा गाडीको पास समेत आधिकारिक नभएका कारण सवारी, चालक र सहयोगी गरी १६ जनालाई महोत्तरीको गौशालामा राखिएको एसपी अधिकारीले बताए।