रुकुम पश्चिममा चट्याङ लागेर एक जनाको मृत्यु भएको छ भने ९ जना घाइते भएका छन्।
रोल्पाको गंगादेव गाउँपालिका निवासी १३ वर्षीया निर्मला खत्रीको चट्याङ लागेर घटनास्थलमै मृत्यु भएको जिल्ला प्रहरी प्रमुख ठगबहादुर केसीले जानकारी दिए।
डिएसपी केसीका अनुसार बुधबार बेलुका साढे ६ बजेतिर त्रिवेणी गाउँपालिका वडा नं. ४ को उभानेटास्थित मामा घरमा गएकाबेला खत्रीलाई चट्याङले हानेको थियो।
स्थानीय गंगाराम खड्का र प्रकाश विकको घरमा चट्याङ लागेर घाइते भएका ९ जनामध्ये २० वर्षीया अनिता विकको अवस्था गम्भीर छ।
उनलाई जिल्लाको प्रारम्भिक उपचारपछि थप उपचारको लागि नेपालगञ्ज रिफर गरिएको डिएसपी केसीले जानकारी दिए।
घटनाका अन्य घाइते सोही ठाउँका २२ वर्षका प्रकाश विक, ११ वर्षीया तुलसा खड्का, १७ वर्षीया सुशिला खड्का, २२ वर्षीया पवित्रा खड्का,५० वर्षीया धनमाया खड्का,४ वर्षीया केशव खड्का,२८ वर्षीय कपिल खड्का र रोल्पा गंगादेव गाउँपालिका ४ मथेना निवासी ६० वर्षीया सीता ओली रहेको डिएसपी केसीले जानकारी दिए।
यो समाचार तयार पार्दासम्म अन्य सबै आठ जना घाइतेको रुकुमै उपचार भइरहेको प्रहरीले जानकारी दिएको छ।
