कोरोना संक्रमणको खतरा बढ्दै गर्दा जोखिम न्यूनीकरण, सतर्कता, पूर्वतयारी, प्रतिकार्य, तथा सचेतनाका लागि स्थानीय सरकारको भूमिका खोज्न थालियो।
स्थानीय तह पनि आआफ्नो भूमिका पूरा गर्न सक्रिय भए। त्यही भूमिका पूरा गर्नुपर्ने जिम्मा पाएका पाँचथरको फाल्गुनन्द गाउँपालिकाका अध्यक्ष वीरबहादुर कुरुम्बाङ त्यत्तिमा सिमित छैनन्।
उनी गाउँगाउँ जान्छन् अनि मास्क बाँड्छन्। मास्कको सुरक्षित प्रयोग कसरी गर्ने, कसरी सफा गर्ने र पुनः प्रयोग गर्ने, कहाँ लगाउने र कहाँ नलगाउने भनेर उनी सिकाउँछन्।
गाउँपालिकाबाट हालसम्म करिब सात हजार पाँच सय थान मास्क वितरण भइसकेको छ। त्यसमध्ये हजारभन्दा बढी अध्यक्ष कुरुम्बाङ स्वयम्ले गाउँगाउँमा वितरण गरेका छन्।
'फाल्गुनन्दका वडा नं. ५, ६ र ७ का पुग्नैपर्ने घरहरुमा पुगेँ। आफैँ सचेत मानिसहरुलाई भनिरहन परेन,' कुरुम्बाङले भने, 'पुनः जनताका घरघर जान पनि पाएँ। जान्ने बुझ्नेले मास्क खरीद गरेर लगाउनुभएकै छ। कोरोना भाइरसको संक्रमणबाट बच्ने उपायहरु अपाइरहनुभएकै छ।'
कुरुम्बाङले मास्क खरीद गरेर प्रयोग गर्न नसकेका गाउँपालिकावासीलाई मास्क दिँदै संक्रमणबाट बच्ने उपायबारे बताउँदै आएका छन्।
एकै कार्यपालिका बैठकमा अध्यक्ष कुरुम्बाङले क्वारेन्टाइनको व्यवस्थापन, पिपिइलगायत स्वास्थ्यकर्मीको सुरक्षाका सामग्री, औजार र उपकरणको प्रबन्ध, गाउँपालिकाको विपद् व्यवस्थापन कोष निर्माण गर्ने निर्णय गराए। यति गरेपछि गाउँकार्यपालिकाले काम गर्न पायो।
विपद् व्यवस्थापन कोष बलियो बनाउनुपर्ने आवश्यकता देखेपछि गाउँकार्यपालिकाका सबै सदस्यको एक महिनाको सुविधा त्यहाँ जम्मा गराउने प्रस्ताव गरे।
'एकैपटक लाखौँ रकम स्वस्फुर्त जम्मा हुने भयो। गाउँपालिकालाई आर्थिक भार परेन,' प्रमुख प्रशासकीय अधिकृत अनिल तिखत्रीले भने, 'यो कोषको मद्दतले भविष्यमा पनि महामारी तथा विपद् व्यवस्थापनमा ठूलो सघाउ पुग्ला।'