उपत्यकाभित्रका स्थानीय तहहरुले ३ जनासम्मको परिवारलाई १५ किलो चामल र ३ जना भन्दा धेरै भएको परिवारलाई ३० किलो चामल उपलब्ध गराउने भएका छन्।
उपत्यका नगरपालिका फोरम काठमडौंको आज बसेको बैठकले ३ जनासम्मको परिवार र ३ जनाभन्दा माथिको परिवारलाई राहत दिने कोटा तय गरेको छ।
जसअनुसार ३ जनाको परिवारले डेढ किलो दाल पाउनेछ भने त्यो भन्दा धेरै सदस्य हुने परिवारले ३ किलो पाउनेछ। त्यस्तै ३ जनाको परिवारले १ प्याकेट नुन, १ लिटर तेल, चिनी १ किलो, साबुन एउटा पाउनेछन्। ३ जना भन्दा बढी हुने परिवारलाई २ प्याकेट नुन, २ लिटर तेल, २ केजी चिनी, ४ वटा साबुन दिइने भएको छ।
आपूर्ति तथा राहत वितरणको व्यवस्थापन स्थानीय तहले गर्नेछ। अत्यावश्यक सामान विक्री वितरण गर्दा विक्रेता र ग्रहकबीच न्युनतम एक मिटरको दूरीको नियम पालन गर्नुपर्ने निर्णय बैठकले गरेको छ।
आपूर्ति तथा राहत वितरणका लागि प्रत्येक वडामा वडाध्यक्षको संयोजकत्वमा स्थानीय सुरक्षा निकायसहितको कमिटी गठन गर्ने, संघीय सांसद तथा प्रदेश सांसदसँग समन्वय गरी स्थानीय प्रशासनको रोहवर र सहजीकरणमा वितरण गर्नेलगायतका निर्णय पनि गरेको छ ।
