प्रदेश-२ को जनकपुरमा आजेदेखि कोरोनाभाइरस (कोभिड-१९) को परीक्षण सुरू गरिएको छ।
प्रदेशका सामाजिक विकास मन्त्री नवलकिशोर साहले बिहानदेखि परीक्षण सुरू भएको जानकारी दिए।
उनले अब प्रदेश-२ को नमूना परीक्षण जनकपुरबाटै गरिने बताए।
सकारले चीनबाट ल्याएको पाँच वटा पोर्टेवल पिसिआर मेसिनमध्ये एउटा जनकपुरलाई पनि दिएको थियो।
मन्त्री साहले प्रदेशले थप दुइटा पिसिआर मेसिन खरिद गर्ने जनाए।
उनले परीक्षणको दायरालाई फराकिलो पार्ने भन्दै दुइटा मेसिन खरिदको लागि प्रक्रिया अगाडि बढाइएको जानकारी दिए।
यसअगाडि धरान, हेटौंडा, पोखरा, सुर्खेत र धनगढीमा पनि कोरोना परीक्षण सुरू भइसकेको छ।
बुटवलमा पनि एकदुई दिनभित्रै परीक्षण सुरू गर्ने तयारी रहेको छ।
काठमाडौंमा भने यसअगाडि नै देशभरको नमूना परीक्षण हुँदै आएको छ।
अहिलेसम्म देखिएका सबै पोजेटिभ नतिजा पनि काठमाडौंमै परीक्षण गरिएको हो।
नेपालमा कोरोना संक्रमितको संख्या ६ पुगेको छ।
बिहीबार मात्र बाग्लुङकी ६४ वर्षीया महिलामा कोरोना संक्रमण पुष्टि भएको थियो।
उनी हाल धौलागिरि अञ्चल अस्पतालमा उपचाररत छिन्।