प्रदेश-२ को सरकारले कोरोना भाइरसको संक्रमण नियन्त्रणका लागि नीति निर्माण गर्ने जिम्मा विज्ञहरूलाई दिएको छ।
मुख्यमन्त्री लालबाबु राउतको नेतृत्वमा रहेको कोरोना महामारी नियन्त्रण निर्देशक समितिले कोभिड-१९ को महामारी नियन्त्रणका लागि आवश्यक नीति निर्माण गर्नका लागि सम्बन्धित विज्ञहरूलाई जिम्मा लगाएको हो।
कोरोना भाइरससँग सम्बन्धित तथ्यांक प्रदेश-२ मा तथ्यगत नरहेको कुरा उठिरहेको बेला प्रदेश-२ को सरकारले सोही तथ्यांक संकलन तथा नीति निर्माणको जिम्मा विज्ञहरूलाई दिएको बताइएको छ।
निर्देशक समितिले बिहीबार मात्रै गठन गरेको स्वास्थ्य सल्लाहकार समितिसँगको बैठकमा महामारी नियन्त्रणका लागि सरकारले गर्नुपर्ने कार्यहरूको तथ्यगत सूचीसहितको नीति निर्माण गर्ने जिम्मेवारी दिएको थियो।
मुख्यमन्त्री राउतले सल्लाहकार समितिलाई सम्बन्धित विज्ञहरूसँगको सल्लाहमा नीति बनाएर प्रदेश सरकारलाई यथाशीघ्र उपलब्ध गराउन आग्रह समेत गरेका छन्।
बैठकमा मुख्यमन्त्री राउतले कोरोना संक्रमण रोक्नका लागि सुस्त गतिमा कार्य हुँदै आइरहेकोमा आगामी दिनमा प्रदेश सरकारले द्रुत गतिमा कार्य गर्ने प्रतिबद्धता व्यक्त गरे।
कोरोना संक्रमण रोक्न प्रदेश सरकारले कुनै कसर बाँकी नराख्ने उनले बताए।
यसका लागि आवश्यक उपकरण तथा एम्बुलेन्स खरिद गर्न प्रदेश सरकार सहयोग गर्न तत्पर रहेको समेत मुख्यमन्त्री राउतले बताए।
सल्लाहकार समितिमा डा. राम केवल साह, डा. सुरेन्द्र यादव, डा. प्रविण मिश्र, डा.काशिकान्त झा, डा. विजय कुमार सिंह, डा. गरिब दास ठाकुर, डा. जेके लाल रहेका छन्।
सल्लाहकार समितिले आजैदेखि कार्य प्रारम्भ गरेर यथाशीघ्र आफ्ना सुझावहरू सरकारलाई बुझाउने डा. राम केवल साहले बताए।
बैठकमा मुख्यमन्त्रीको नेतृत्वमा रहेको निर्देशक समिति, प्रमुख सचिवको नेतृत्वमा रहेको कार्यकारी समिति र स्वास्थ्य सल्लाहकार समितिका सदस्यहरूको उपस्थिति रहेको थियो।
