बाग्लुङ कुँडुलेकी १९ वर्षीया युवतीको कोरोनाभाइरस (कोभिड-१९) को दोस्रो परीक्षणको नतिजा पनि पोजेटिभ देखिएको छ।
पारिवारिक स्रोतले उनको दोस्रो परीक्षणको नतिजा पनि पोजेटिभ आएको सेतोपाटीलाई जानकारी दिए।
स्रोतका अनुसार अस्पतालले परिवारलाई बिहीबार राति पोजेटिभ आएकोबारे जानकारी गराएको हो।
योसँगै युवतीको अस्पताल बसाइ लम्बिने भएको छ।
हाल उनी धौलागिरि अञ्चल अस्पतालमा उपचाररत छिन्।
गत चैत ४ गते बेल्जियमबाट कतारको दोहा हुँदै नेपाल आएकी उनमा कोरोना संक्रमण देखिएको थियो।
युवतीको परिवारमा रहेका सात जना सदस्यको पनि कोरोना परीक्षण गरिएकोमा सबैको नतिजा नेगेटिभ आएको छ।
बिहीबार युवतीसँगै बेल्जियमबाट आएका बाग्लुङकै ६५ वर्षीया महिलामा पनि कोरोना संक्रमण देखिएको थियो।
अहिले ती महिलालाई पनि सोही अस्पताल भर्ना गरिएको छ। दुबै संक्रमित नातेदार समेत हुन्। परिवारिक सदस्यका अनुसार महिला युवतीकी हजुरआमा पर्छिन्।
अस्पतालले भने दुबै संक्रमितको अवस्था सामान्य रहेको जनाएको छ।
