भारतमा क्वारेन्टाइनमा बसेका एक मजदुरले आत्महत्या गरेका छन्।
उत्तर प्रदेशको लखिमपुरका २२ वर्षीय रोशन लाललाई एक विद्यालयमा क्वारन्टाइनमा राखिएको थियो। उनी लक डाउनअघि दिल्लीको गुडगाउँमा इलेक्ट्रसियनको काम गर्थे।
अघिल्लो बुधबारदेखि भारतभरि लक डाउन भएपछि उनी अलपत्र परेका थिए। पछि उत्तर प्रदेश सरकारले बसको व्यवस्था गरेर आफ्ना नागरिकलाई दिल्लीबाट ल्याएको थियो।
तीनै मध्येको एउटा बसमा चढेर रोशन गाउँ फर्किएका थिए।
गाउँमा आएपछि पनि उनी घर जान पाएनन्, क्वारेन्टाइनमा बस्नु पर्यो।
क्वारेन्टाइनमै बसेका बेला उनकी सालीले फोन गरेर घरमा केही खाद्यान्न नभएको बताएकी थिइन्। त्यसपछि उनी सालीलाई सामान किन्ने पैसा दिन क्वारेन्टाइनबाट बाहिर निस्किए।
फर्केर आएपछि क्वारेन्टाइनमा बसेको मान्छे किन बाहिर निस्किएको भने प्रहरीले उनलाई कुटपिट गर्यो।
प्रहरीको कुटपिटपछि निराश भएका रोशनले मंगलबार राति रूखमा झुन्डिएर आत्महत्या गरे।
आत्महत्या गर्नुअघि उनले दुई अडिओ क्लिप रेकर्ड गरेका थिए। अहिले ती क्लिप भारतीय सामाजिक सञ्जाल प्रयोगकर्ताबीच भाइरल भइरहेका छन्।
ती क्लिपमा उनले प्रहरीले आफूलाई निर्मम कुटपिट गरेको र आत्महत्या गर्न बाध्य बनाएको बताएका छन्।
'अनुप नामका हवल्दार आएर म रोशन हो कि होइन भनेर सोधे। मलाई निर्मम तरिकाले कुटपिट गरे। अहिले मेरो दाहिने हात चलेको छैन। त्यसपछि मलाई चौकीको इन्चार्जसँग कुराकानी गर्न लगाए। मैले मेरो उपचार गर्न माग राखें तर उनले सहयोग गरेनन,' सार्वजनिक भएको अडिओमा उनले भनेका छन्।
कुटपिट गर्दा आफ्नो शरिरबाट रगत बगेर ट्राउजरभरि लागेको उनले बताएका छन्।
'मलाई अब बाँच्न मन छैन। प्रहरी हवल्दार अनुपकुमार सिंहलाई कारबाही हुनुपर्छ। उसको कारणले म आफैंलाई मार्दैछु,' उनले भनेका छन्।
प्रहरीले ती हवल्दारविरूद्ध उजुरी दर्ता गर्न नमानेपछि परिवारले रोशनको शव उठाउन मानेका छैनन्।
प्रहरी प्रमुखले भने क्वारन्टाइनको नियम पालना नगर्दा रोशनमाथि दुई थप्पड हानेको हुन सक्ने बताएका छन्।
उनले ती प्रहरी हवल्दारमाथि अनुसन्धान गर्ने पनि बताएका छन्।
