धनगढीका कोरोनाभाइरस (कोभिड-१९) संक्रमित युवाको परिवारको कोरोना रिपोर्ट नेगेटिभ आएको छ।
स्वास्थ्य मन्त्रालयले शनिबार ती युवाको भाउजूमा भने कोरोना संक्रमण भएको पुष्टि गरेको थियो। तर परिवारका अन्य ७ जनाको नतिजा नेगेटिभ आएको छ।
परिवारका सदस्यका अनुसार अस्पतालले बाँकी ७ जनाको नतिजा नेगेटिभ आएको जानकारी गराएको हो।
मंगलबार परिवारका अन्य सदस्यको पनि परीक्षणको लागि स्वाब काठमाडौं पठाइएको थियो। जसमा संक्रमित युवकको भाउजूलाई संक्रमण देखिएको हो।
अहिले दुवै संक्रमितको धनगढीस्थित सेती प्रादेशिक अस्पतालमा उपचार भइरहेको छ।
गत चैत ७ गते दुबईबाट आएका धनगढीका युवकमा कोरोना संक्रमण देखिएको थियो।
शनिबार उनै संक्रमित युवकको भाउजूलाई पनि कोरोना पुष्टि भएको हो।
यो नेपालमा एक व्यक्तिबाट अर्को व्यक्तिमा संक्रमण सरेको पहिलो घटना हो।