कोरोना संक्रमित २१ वर्षीय युवासँगै भारतबाट आएका दाङका १० युवाको पहिचान खुलेको छ।
कैलालीका एक युवामा कोरोनाभाइरस पोजेटिभ देखिएपछि उनीसँगै भीडमा रहेकाको खोजी कार्य भइरहेको छ। चैत ११ गते गौरीफन्टा नाकामा नेपाल प्रवेश पाउनुपर्ने माग गर्दै संक्रमित ती व्यक्तिसहितकाे ठूलो भीड लागेको थियो।
सो भीडमा रहेकामा दाङ देउखुरीअन्तर्गत लमही नगरपालिका वडा नं ५ का २० वर्षीय शेरबहादुर कुमाल, सोही ठाउँका २५ वर्षीय रमेश मल्ल, राजपुर गाउँपालिका ७ का २६ वर्षीय अमर कुमाल, सोही ठाउँका १९ वर्षीय रामसागर थारु छन्।
त्यसैगरी घोराही उपमहानगरपालिका ४ का २२ वर्षीय टिकाराम रोका, सोही ठाउँकै २२ वर्षीय पदमकुमार रोका, २९ वर्षीय दिपक पुन, २६ वर्षीय मोहन रोका र १७ वर्षीय जीवन रोका संक्रमित व्यक्तिसँगैको भीडमा रहेको खुलेको छ।
पश्चिम दाङको बबई गाउँपालिका २ का १९ वर्षीय दशरथ परियार पनि उक्त दिन सँगै आएको स्थानीय प्रशासनले जानकारी दिएको छ।
दाङका प्रमुख जिल्ला अधिकारी गोविन्द्रप्रसाद रिजालले दशैजनाको खोजी सुरु भएको जानकारी दिए।
‘हामी उनीहरु सबैलाई खोजेर बेलझुण्डीस्थित कोरोना विशेष अस्पतालमा ल्याउने तयारीमा छौं,’ प्रजिअ रिजालले भने ‘ हेरौँ कतिलाई आज ल्याउन सकिन्छ।’
