सरकारले निजी अस्पतालमै बसेर कोरोना नियन्त्रणको क्षेत्रमा काम गर्ने स्वास्थ्यकर्मी तथा चिकित्सकलाई नेपाल सरकार मातहतका कर्मचारी बराबरको सुविधा दिने निर्णय गरेको छ।
सोमबार बसेको मन्त्रिपरिषद् बैठकले सो निर्णय गरेको हो।
यसैगरी, निजी क्षेत्रका चिकित्सकहरूले सरकारी अस्पतालमा गएर काम गर्न चाहेमा सम्बन्धित तहअनुसार मिलान गरेर काम गर्ने र सेवासुविधा सरकारी कर्मचारी अनुसार हुने व्यवस्था गर्ने निर्णय पनि बैठकले गरेको छ।
त्यस्तै, स्वास्थ्य स्वयंसेविकालाई एक पटकका लागि प्रतिव्यक्ति १५ सय रुपैयाँ उपलब्ध गराएर क्वारेन्टिनमा बसे/नबसेको अनुगमनका लागि खटाउने निर्णय पनि बैठकले गरेको छ।
यसैगरी क्वारेन्टिनमा बस्नुपर्ने व्यवस्थालाई १४ दिन पछि र्यापिड डाइग्नोस्टिक टेस्ट गरी ७ दिन आफैं अनिवार्य क्वारेन्टिनमा बस्नुपर्ने र त्यसको व्यवस्था तथा अनुगमन स्थानीय तहले गर्ने निर्णय पनि बैठकले गरेको छ।