कोरोना भाइरसका उदगम थलो हुबेई प्रान्तको राजधानी वुहानमा बुधबारदेखि यातायात सेवाहरू फेरि सुरू भएको छ।
७६ दिनको लक डाउनपछि बुधबार बिहान वुहानबाट बस, रेल र विमान फेरि सञ्चालनमा आएका हुन्।
विमान तथा रेल चल्ने भएपछि मंगलबार राति विमानस्थल तथा रेल्वे स्टेसनबाहिर मान्छेको लाइन लागेको थियो।
बुधबारमात्रै २७६ रेल वुहानबाट छुट्ने चाइना डेलीले जनाएको छ।
ती रेलहरू ग्वाङडोङ, सिचुवानलगायत प्रान्तका शहरमा जानेछन्। ५५ हजार बढी यात्रुले ती रेलमा यात्रा गर्ने जनाइएको छ।
साथै तीव्र गतिको बुलेट ट्रेन जी ४३१ पनि बुधबारदेखि सञ्चालनमा आएको छ। उक्त बुलेट ट्रेन बिहान ७ बजे नानिङ शहरका लागि छुटेको थियो।
वुहानको अन्तर्राष्ट्रिय विमानस्थलले पनि बुधबारदेखि आन्तरिक उडान सुरू गरेको छ।
उक्त विमानस्थलमा बुधबार २०० भन्दा बढी विमानले उडान र अवतरण गर्ने जनाइएको छ।