सरकारले सातवटै प्रदेशमा र्यापिड डाइगोनिस्टिक किटबाट कोरोनाको परीक्षण गर्ने जनाएको छ।
बिहीबार स्वास्थ्य मन्त्रालयका प्रवक्ता डाक्टर विकास देवकोटाले प्रत्येक प्रदेशमा ५ हजारको दरले किट पठाइएको जानकारी दिए।
सरकारले यो किटबाट सुदूरपश्चिमको कैलालीमा परीक्षण गर्न सुरू गरिसकेको छ। यो किटले १५ मिनेटमै परीक्षणको नतिजा दिन्छ। सरकारले सात करोड रुपैयाँ बढी खर्चेर चीनबाट ७५ हजार किट ल्याएको छ।
त्यहाँका जिल्लाभर क्वारेन्टिनमा रहेका साढे चार सय व्यक्तिको परीक्षण गर्ने भनिएको छ।
यो किटको गुणस्तर जाँच्न कैलाली र कञ्चनपुरबाट २ सय नमूना राष्ट्रिय जनस्वास्थ्य प्रयोगशालामा ल्याइएको छ। जसमा ६६ जनाको परीक्षण भएको र उनीहरूको नतिजा नेगेटिभ आएको मन्त्रालयले जनाएको छ।