कोरोना भाइरसबाट सर्वाधिक प्रभावित मुलुकमध्येको एक इटालीले देशमा जारी लकडाउनलाई मे ३ सम्म बढाउने योजना बनाएको छ।
रोयटर्सले देशका दुई ट्रेड युनियन श्रोतलाई उद्धृत गर्दै लेखेको समाचारमा मन्त्रीहरूसँगको छलफलपछि इटालीले यस्तो योजना बनाएको जनाएको छ।
इटाली मार्च ३ देखि लकडाउनमा रहँदै आएको छ। उसले लगाएको लकडाउनको पछिल्लो समयसीमा अप्रिल १३ मा सकिदैंछ।
'आजको कुरा अनुसार प्रधानमन्त्रीले रोक लगाइएका गतिविधि सुरु गर्ने अवस्था नरहेको निश्चित गर्नुभएको छ', यूआईएल युनियन नेता करमेलो बार्बाग्यालोले भने।
ट्रेड युनियन र उद्योग श्रोतहरूका अनुसार बन्द उद्योगहरू खोल्न अप्रिल सकिनु अगावै सरकारले केही खुकुलो प्रवाधान ल्याउनसक्ने बताएका छन्।
फरवरी २१ मा कोरोना भाइरसको महामारी सुरु भएयता इटालीमा १८ हजार २ सय ७९ जनाको संक्रमणबाट मृत्यु भइसकेको छ। कोरोना भाइरसबाट ज्यान गुमाउने मुलुकमा इटाली पहिलो नम्बरमा रहेको छ।
त्यहाँ हालसम्म १ लाख ४३ हजार ६ सय २६ जनामा संक्रमण पुष्टि भएको छ। संक्रमित संख्यामा इटाली अमेरिका र स्पेनपछि तेश्रो नम्बरमा रहेको छ।
