भारतीय नागरिक जबरदस्ती रूपमा नेपाली सीमाभित्र प्रवेश गर्न खोजेपछि सशस्त्र प्रहरीले हवाई फायर गरेको छ।
सर्लाहीको विष्णु गाउँपालिकामा पर्ने नेपाल-भारत सीमा सुरूमा एक व्यक्ति नेपाल प्रवेश गर्न खोज्दा सशस्त्र प्रहरीले उनलाई भारततर्फ नै फर्काइदिएको थियो।
नेपाल छिर्न नपाएपछि फर्किएका उनले आफ्नो साथ करिब ४०-५० जना मानिसहरू ल्याएर जबरजस्ती गर्न खोजेपछि स्थितिलाई नियन्त्रणमा लिन हवाई फायर गर्नुपरेको जानकारी सशस्त्र प्रहरीका डिआईजी तथा प्रवक्ता प्रविण कुमार श्रेष्ठले सेतोपाटीलाई दिएका छन्।
उनका अनुसार घटना बिहान साढे ६ बजेतीर भएको बताए।
स्थितिलाई नियन्त्रणमा लिने क्रममा प्रहरीले एक राउण्ड हवाई फायर गरेको थियो।
कोरोना भाइरसको लकडाउन सुरू भएयता नेपाल-भारत सीमाक्षेत्रमा यस किसिमका तनावहरू बढ्न थालेका छन्।
यसमा विशेषगरी सीमावर्ती क्षेत्रका भारतीय नागरिकहरूले बलजफ्ती गर्नेगरेको पाइएको छ।
हाल त्यहाँको स्थिति सामान्य रहेको छ।
