लकडाउनको समयमा सुन पसलमा चोरी गर्ने एक जना र चोरीको सो सामान किन्ने दुई जना पक्राउ परेका छन्।
सोमबार महानगरीय अपराध महाशाखाको टोलीले चोरीमा संलग्न पोखरा महानगरपालिका १० अमरसिंह चोक घर भइ गोङ्गबु बस्दै आएका १७ वर्षीय मिलन तामाङलाई पक्राउ गरेको हो।
गत वैशाख ६ गते राति काठमाडौं महानगरपालिका सरकारीधारास्थित नोर सुन चाँदी पसलबाट उनले अन्दाजी दुई लाख २३ हजार रूपैयाँ बराबरको चोरी गरेका थिए।
साथै प्रहरीले चोरी गरेको सामान किन्ने नुवाकोट तार्केश्वर गाउँपालिका ४ घर भइ काठमाडौंको ठमेलमा वस्दै आएका ३१ वर्षीय प्रेम तामाङ र भारतको मोतिहारी सुगौली ६ का २५ वर्षीय ऋषिमुनि कुमारलाई पक्राउ गरेको छ।
प्रहरीले उनीहरूबाट एक थान सुनको मंगल सुत्र, एक थान सुनको हार, २५ थान चाँदीको पाउजु, दुई थान चाँदीको किरिङ, एक थान चाँदीको दीयो, सात थान चाँदीको कल्ली, तीन थान चाँदीको औंठी र दुई थान चाँदी जन्तर बरामद गरेको छ।
साथै तीन थान चाँदीको प्लेट, एक थान चाँदीको बेरुवा बाला, एक थान चाँदीको ब्रासलेट, एक थान चाँदीको सिक्री र १३ थान चाँदीका लकेट पनि बरामद गरिएको प्रहरी महाशाखाका एसपी होविन्द्र बोगटीले बताए।
‘हामीले केही दिन देखि उनीहरूको निगरानी गरिरहेका थियौं। आज गोंगबुको पेट्रोल पम्प अगाडिबाट पक्राउ गर्यौं,’ महाशाखाका एसपी बोगटीले भने।
प्रहरीले उनीहरूमाथि थप अनुसन्धान गर्न महानगरीय प्रहरी वृत्त महाराजगन्जमा बुझाएको छ।
