बुटवल कोरोना आइसोलेसन अस्पतालमा उपचाररत दाङका युवाको अवस्था गम्भीर बन्दै गएको छ।
दाङको बबई गाउँपालिका- ६ का ३० वर्षीय युवालाई कोरोनासँगै डेंगीको संक्रमण देखिएको छ।
दाङको बेलझुण्डी अस्पतालमा रहेका उनलाई मंगलबार स्वास्थ्यमा समस्या देखिएपछि बुटवलस्थित कोरोना विशेष आइसोलेसन अस्पतालमा रिफर गरिएको थियो। अहिले उनको बुटवल धागो कारखानास्थित कोरोना अस्पतालको आइसियूमा उपचार भइरहेको छ।
लुम्बिनी प्रादेशिक अस्पतालका कोरोना फोकल पर्सन डाक्टर सुदर्शन थापाले ती युवालाई कोरोना र डेंगीको संक्रमणसँगै ज्वरो र निमोनिया देखिएको जानकारी दिए।
‘स्वास्थ्य अवस्था गम्भीर बन्दै गएको छ, सघन उपचार कक्षमा राखी उपचार गरिरहेका छौं,’ उनले भने।
अहिले कोरोना विशेष अस्पताल बुटवलमा ३० जना उपचाररत छन्। तीमध्ये तीन जनाको आइसियूमा उपचार भइरहेको छ भने २७ जना आइसोलेसनमा छन्।
आइसियूमा रहेका कपिलवस्तुका २२ वर्षीय कोरोना संक्रमितको यसअघि २ दिन भेन्टिलेटरको सहायतामा उपचार भइरहेकोमा अहिले स्वास्थ्य अवस्था सुधार हुँदै गएको थापाले जानकारी दिए।
त्यस्तै अर्का एकजना रुपन्देहीका संक्रमितको पनि आइसियूमा उपचार भइरहेको थापाले जानकारी दिए। मनिटरसहितका आठ बेडको आइसियूमा चारवटा भेन्टिलेटर छन्।
अस्पतालले कोरोना संक्रमण पुष्टि भएका र स्वास्थ्यमा खासै असर नदेखिएका संक्रमितलाई आइसोलेसनमा उपचार गर्ने गरेको छ भने संक्रमणसँगै स्वास्थ्यमा समस्या देखिएकाहरुलाई आइसियूमा राख्ने गरेको छ।
