स्वास्थ्य तथा जनसंख्या मन्त्रालयले क्वारेन्टिन बसाइँपछि घर फर्किने व्यक्तिहरूलाई केही घरबेटीहरूले प्रवेश गर्न नदिएको भन्दै आफ्नो गम्भीर ध्यानाकर्षण भएको जनाएको छ।
मन्त्रालयका प्रवक्ता डा. जागेश्वर गौतमले केही घरबेटीले क्वारेन्टिनबाट फर्किएका व्यक्तिलाई पिसिआर रिपोर्ट नभएको भन्दै प्रवेश गर्न नदिएको भन्दै यस्तो तथ्यहीन र निर्देशिकाविपरीत कार्य नगर्न आग्रह गरेका छन्।
उनले क्वारेन्टिनमा बसेको प्रमाण छ र व्यक्तिमा कोरोनाको कुनै लक्षण छैन भने पिसिआर नगरी घर पठाउन मिल्ने जनाए।
साथै, लक्षण नभएका व्यक्तिबाट कोरोना नसर्ने उनले बताए। यसअघि पनि मन्त्रालयले घरबेटीहरूले डेरावालाहरूलाई पिसिआर रिपोर्ट देखाउन भन्दै दुःख दिएकोप्रति सचेत गराएको थियो।
पछिल्लो समय उपत्यका भित्रिने डेरामा बस्ने व्यक्तिहरूलाई पिसिआर रिपोर्ट अनिवार्य गरेपछि प्रयोगशाला भएका अस्पतालहरूमा मानिसहरूको घुइँचो लाग्ने गरेको छ।
यसरी लक्षणविहीन रहेका व्यक्तिहरूको परीक्षण चाप बढेपछि वास्तविक परीक्षण गर्नुपर्ने नमूना बेलामै परीक्षण हुन सकेको छैन।
यही चापलाई हेरेर मन्त्रालयले कोभिड-१९ सम्बन्धी नयाँ टेस्टिङ निर्देशिका जारी गरेको थियो।
सो निर्देशिकामा लक्षणविहीन अवस्थामा रहेका व्यक्तिहरूको पिसिआर परीक्षण गर्न नपर्ने उल्लेख छ।