अछामको बयलपाटा अस्पतालमा आत्मदाह गरेका सिद्धार्थ आउजीका परिवारलाई साँफेबगर नगरपालिकाले दुई लाख रुपैयाँ दिएको छ।
आउजीकी श्रीमती गौरीका नाममा एक लाख र छोरी र छोराका नामको खातामा ५०/५० हजार रुपैयाँ जम्मा गरिएको वडा नम्बर ६ का अध्यक्ष प्रेम शर्माले बताए।
‘आज दिउँसो नगरपालिकाका तर्फबाट सिद्धार्थका परिवारको नाममा राष्ट्रिय वाणिज्य बैंकका खातामा रकम पोस्टिङ भएको छ’, उनले भने।
गौरीको परिवारलाई यसअघि बयलपाटा अस्पतालले ५ लाख रुपैयाँ सहयोग गरिसकेको छ।
अस्पतालले गौरीलाई जागिर समेत दिने भएको छ।
साउन १७ गतेपछि सिद्धार्थको ठाउँमा जागिर सुरू गर्ने गौरीले बताइन्।
बयलपाटा अस्पतालले करारमा काम गर्ने ३५ जना कर्मचारीको सेवा अवधि थप नगर्ने भनेपछि सिद्धार्थले गएको जेठ २६ गते आफ्नै शरीरमा आगो लगाएका थिए।
उनको उपचारका क्रममा कोहलपुरमा मृत्यु भएको थियो।
यो घटनापछि अस्पतालले अन्य ३४ जनाको करार अवधि नथप्ने भन्ने निर्णय स्थगित गरिसकेको छ।