धनुषामा ११ वर्षीया बालिका कञ्चन पञ्जियारको हत्या गर्नेलाई हदैसम्मको सजाय हुनुपर्ने माग गर्दै स्थानीयले प्रदर्शन गरेका छन्।
कुर्था युवा क्लवको अगुवाईमा आइतबार स्थानीय युवाहरुले कञ्चनको हत्यामा संलग्न अपराधीलाई तत्काल पक्राउ गरेर कारबाही गर्न माग गर्दै प्रदर्शन गरेका हुन्।
जनकपुरधाम उपमहानगरपालिका वडा नम्बर २१ कुर्थाकी ११ वर्षीया कञ्चन गत असार १७ गते (बुधबार) भैँसी चराउन गएदेखि बेपत्ता भएकी थिइन्। दुई दिनपछि उनको शव भेटिएको थियो।
घटना भएको ४ दिन बितिसक्दा पनि वास्तविक दोषीलाई प्रहरीले पक्राउ गरी सार्वजनिक गर्न नसकेको भन्दै उनीहरुले आक्रोश व्यक्त गरेका छन्।
आशंकामा डेढ दर्जन व्यक्ति पक्राउ
धनुषामा ११ वर्षीया बालिका कञ्चन पञ्जियारको हत्यामा संलग्न रहेको आशंकामा प्रहरीले १८ जनालाई पक्राउ गरेको छ।
गत शुक्रबार बिहान जनकपुरधाम उपमहानगरपालिका वडा नं. २१ म अर्धनग्न अवस्थामा मृत भेटिएकी कञ्चनको शव भेटिएको दिनदेखि नै अनुसन्धान थालेको धनुषा प्रहरीले घटनाको चार दिनमा १८ जनालाई नियन्त्रणमा लिई अनुसन्धान गरेको छ।
यसअघि घटना भएको दिन नै सोही वडास्थित कुटीमा बस्ने अघोरी बाबा र दुई जना अन्य नाम नखुलेका युवाहरुलाई नियन्त्रण लिएको थियो ।
अनुसन्धानको क्रममा पक्राउ परेका सबै युवाहरु लागूऔषध प्रयोगकर्ता समेत रहेको प्रहरीले जनाएको छ।
