कञ्चनपुरको भीमदत्त नगरपालका वडा नम्बर ९ का वडा अध्यक्ष रामनाथ बलात्कारको आरोप लागेपछि चार दिनदेखि प्रहरी हिरासतमा छन्।
ब्रह्मदेवकी एक महिलालाई दुर्व्यवहार गरेको अरोप लागेपछि उनी असार १८ गते राति पक्राउ परेका थिए।
वडाध्यक्ष नाथविरूद्ध जबरजस्ती करणी उद्योगमा ती महिलाले जाहेरी दिएकी छन्।
महिलाले पसलमा मदिरा सेवन गरिरहेका नाथले आफूमाथि जबरजस्ती करणीको प्रयास गरेको भन्दै जाहेरी दिएको कञ्चनपुरका प्रहरी नायब उपरीक्षक अमर बहादुर थापाले बताए।
जिल्ला अदालतबाट पाँच दिन म्याद थप भइ अनुसन्धान भइरहेको उनले जानकारी दिए।
पहिलो पटकको म्याद सकिन लाग्दा थप हुनसक्ने उनले जानकारी दिए।
मदिरा सेवन गरेका वडाअध्यक्षले महिलालाई अंगालो हाल्दै ‘चुम्बन देऊ’ भन्दै दुर्व्यवहार गरेको पीडित पक्षको आरोप छ।
वडा अध्यक्ष नाथले भने दुर्व्यवहार नगरेको दाबी गर्दै आइरहेका छन्।
नाथका पक्षमा महेन्द्रनगरमा दैनिक प्रदर्शन समेत हुने गरेको छ।
उनीमाथिको झूटो मुद्दा खारेज गरी रिहाइ गर्नुपर्ने भन्दै उनका समर्थकले प्रदर्शन गर्ने गरेका छन्।
अर्कातर्फ महिलालाई न्याय दिनुपर्ने भन्दै पीडित तर्फबाट पनि प्रदर्शन हुने गरेको छ।