नागरिक समाज दाङले पिसिआर परीक्षण शुल्क मागेर पिसिआर परीक्षण रोकेकोप्रति गम्भीर ध्यानाकर्षण भएको जनाएको छ।
नागरिक समाज दाङका संयोजक चन्द्रराज पन्तको अध्यक्षतामा मंगलबार बसेको बैठकले राप्ती स्वास्थ्य विज्ञान प्रतिष्ठानले पिसिआर परीक्षणको शुल्क मागेकोप्रति आपत्ति जनाएको छ।
सरकारले परीक्षण निःशुल्क गरिरहेको अवस्थामा प्रतिव्यक्ति पाँच हजार पाँच सयका दरले रकम शोधभर्ना गर्न स्थानीय तहलाई पत्र काटेर परीक्षण बन्द गर्ने कार्यको विरोध गरेको छ।
समाजले तत्काल निःशुल्क परीक्षण पुन:सञ्चालन गर्न माग समेत गरेको छ।
पिसिआर परीक्षण लगायतका विषयमा यथाशक्य छिटो प्रतिष्ठानका पदाधिकारीसहित सर्वदलीय सर्वपक्षीय बैठक गर्ने निर्णय समाजले गरेको सचिव लक्ष्मी आचार्यले बैठकपछि जारी गरेको विज्ञप्तिमा उल्लेख छ।
