राजश्व अनुसन्धान विभागले फर्जी कारोबार देखाएर कर छली गरेको भन्दै जिमी ग्रुपविरूद्ध मुद्दा दायर गरेको छ।
विभागले असार २१ गते उक्त ग्रुपविरूद्ध १८ करोड ३३ लाख बिगो दाबी गर्दै उच्च अदालत पाटनमा मुद्दा दायर गरेको हो।
झुठा तथा नक्कली मूल्य अभिवृद्धि कर बिल प्रयोग गरी राजश्व छली गरेकाले काठमाडौ महानगरपालिका वडा नं. ४ ठेगाना भएको जिमी ग्रुप प्रालिविरूद्ध विभागले मुद्दा दायर गरेको जानकारी गराएको छ। विभागले बिगो असुल उपर गरी कम्पनीका सञ्चालकहरूलाई जरिवाना र कैद सजाय मागदाबी गर्दै मुद्दा दायर गरेको हो।
यो ग्रुपले नेपालमा चामल, दाल, तेलको आयात तथा वितरण गर्दै आएको छ।
विभागले यो जिमीविरूद्ध तीन ओटा अभियोग लगाएको छ। राजश्व छलीसँग सम्बन्धित यस्ता अभियोगमा मूल्य अभिवृद्धि कर बिलको दुरूपयोग गरी छली गरेको, आयकर छलेको तथा लाभकर छली गरेको उल्लेख गरिएको विभागले बुधबार जारी गरेको प्रेस विज्ञप्तिमा बताइएको छ।
यो ग्रुपका अध्यक्ष सुशील थापा हुन्। उनी नयाँ पत्रिका दैनिकका कार्यकारी निर्देशक पनि छन्। उनीसँगै जिमी ग्रुपको सञ्चालकमा जीवन चलाउने र मिन्दु शेर्पा पनि छन्।
अध्यक्ष थापाले भने आफूले यसबारे मुद्दा परेको थाहा पाएको तर यसमा आफ्नो कुनै कमजोरी नभएको प्रतिक्रिया दिए।
'हाम्रो कम्पनी ठूलो छ। हामी विदेशबाट पनि आयात गर्छौं। हामी सबै कारोबार बैंकिङ च्यानलबाट गर्छौं। तर यो कर प्रकरणमा हामीलाई आपूर्तिकर्ताले फसाएको हो। हामीले जसबाट वस्तु तथा सेवा खरिद गरेका थियौं। उसले भ्याट बुझाएको रहेनछ। त्यसैले गर्दा हामी फसेको हाम्रो बुझाइ छ,' थापाले सेतोपाटीसँग भने,'यसमा हामीमात्र होइन अरू कम्पनीलाई त्यो कम्पनीले यस्तै गरेको रहेछ। जे होस् अदालतमा विषय गएको छ। त्यहीबाट छिनोफानो होला।'
विभागका महानिर्देशक दीर्घराज मैनालीले भने विभागले अहिलेसम्म भेटिएका तथ्यबाट अभियोग पुष्टि भएपछि मुद्दा तयार पारेको र कसुर देखिएकाले सरकारी वकिलको कार्यालयले मुद्दा दायर गरेको जानकारी दिए।
'हामीले यसमा क्रस चेक पनि गर्छौं। सामान किनेको कम्पनीका बिल पनि हेर्छौं। बिक्री गरेको कम्पनीका बिल पनि हामी हेर्छौं। यी सबै कुराबाट कसुर देखिने भएकाले मुद्दा गएको हो। हामीले मुद्दा दायर भएको र अनुसन्धानको विषयसम्म जानकारी दिइसकेका छौं। यसभन्दा बढी अब अदालतको विषय भएकाले त्यही छिनोफानो होला,' मैनालीले सेतोपाटीसँग भने।
विभागले जारी गरेको प्रेस विज्ञप्तिमा कम्पनीले वस्तु तथा सेवा खरिद नै नगरी झुठा तथा नक्कली भ्याट बिलमात्र खरिद गरी मूल्य अभिवृद्धि कर र आयकर छलेको विभागले आरोप लगाएको छ। विभागका अनुसार कम्पनीले आफ्नो नाफा न्यून देखाउनका खर्च बढी देखाएको छ। यसरी खर्च देखाउँदा कम्पनीले सक्कली बिल नै पेस गरेको छ। तर कारोबार भने फर्जी देखिएको छ।
'जुन बिक्रेताबाट किनेको दाबी गरिएको छ उसले वस्तु बेचेको देखिँदैन। यसरी जिमी ग्रुपले किन्दै नकिकेको वस्तु तथा सेवा खरिद गरेको बिल देखाएर एकातिर मूल्य अभिवृद्धि कर छली गरेको देखिन्छ भने अर्कोतिर खर्च धेरै देखाएर नाफा न्यून हुन आउँदा आयकर पनि छलेको छ,' विभागले प्रष्ट पारेको छ।
विभागका यी कदम राजस्व चुहावट (अनुसन्धान तथा नियन्त्रण) ऐन २०५२ र राजस्व चुहावट (अनुसन्धान तथा नियन्त्रण) (पहिलो संशोधन २०७६)ले निषेधित गरेको अनुसन्धानबाट पुष्टि भएकाले मुद्दा दायर गरिएको विभागले जानकारी दिएको छ।
अनुसन्धानबाट ५ करोड ९७ लाख ९९ हजार ८२५ रुपैयाँ मूल्य अभिवृद्धि कर छलेको देखिएको विभागले जानकारी दिएको छ। यसमा कम्पनीले सोही बराबरको भ्याट तिरेको बिल देखाएको छ तर त्यस्तो बिलबाट भ्याट भने नेपाल सरकारको राजश्व खातामा देखिएको छैन।
यसरी भ्याट तिरेर खरिद गरेको भनेर विभागले देखाए पनि सो बराबरको वस्तु तथा सेवा खरिद नगरेकाले आय नै धेरै हुने र जसबाट १० करोड ७९ लाख १९ हजार ११५ रुपैयाँ आयकर छलेको विभागले आरोप लगाएको छ। कम्पनीले १ करोड ५६ लाख ३ हजार ८५६ रुपैयाँ लाभांश कर पनि छली गरेको विभागले उल्लेख गरेको छ।
विभागले कम्पनीविरूद्ध बिगो असुल बिगोको दोब्बर जरिवाना तथा सञ्चालक तथा कार्यकारीहरूविरूद्ध कैद सजायाको माग गर्दै मुद्दा दायर गरेको छ।
