कर्तव्य ज्यान मुद्दामा दोषी ठहरिएका शिक्षकलाई निलम्बन नगरी तलब-भत्ता सुविधा प्रदान गर्ने पूर्वप्रधानाध्यापक र व्यवस्थापन समितिका अध्यक्षविरूद्ध अख्तियारले मुद्दा दायर गरेको छ।
बैतडीको बटैराज प्राथमिक विद्यालयका तत्कालीन शिक्षक/प्रधानाध्यापक रतन सिंह भण्डारी र विद्यालय व्यवस्थापन समितिका अध्यक्ष टेकसिंह भण्डारीविरूद्ध सोमबार अख्तियारले मुद्दा दायर गरेको हो।
जिल्ला शिक्षा कार्यालय बैतडीका तत्कालीन जिल्ला शिक्षा अधिकारी, पूर्व जि.सि.अ., स्रोत व्यक्तिसमेतको मिलेमतोमा विद्यालयका शिक्षक रतन सिंह भण्डारीलाई निलम्बन नगरी भत्ता सुविधा दिएर भ्रष्टाचार गरेको उनीहरूमाथि आरोप लागेको छ।
शिक्षक रतन सिंह भण्डारी कर्तव्य ज्यान मुद्दामा दोषी ठहर भएको अख्तियारले जनाएको छ।
सो घटनाबारे छानबिन गरी पाऊँ भन्ने व्यहोराको उजुरी अख्तियारमा परेपछि अनुसन्धान हुँदा प्रधानाध्यापक र अध्यक्षको सहमतिमा दोषी ठहर भएका ती शिक्षकले ८३ हजार एक सय सरकारी रकम बुझेको अख्तियारको भनाइ छ।
आरोपी दुबै जनाविरूद्ध भ्रष्टाचार निवारण ऐन, २०५९ को दफा १७ मा उल्लेख भएबमोजिम सोही रकम बराबर बिगो कायम गरी असुलउपर र सजाय गरी पाउन मागदाबी लिई सोमबार विशेष अदालत, काठमाडौंमा आरोपपत्र दायर गरिएको अख्तियारका प्रवक्ता प्रदीपकुमार कोइरालाले जानकारी दिए।
यस्तै, कर्तव्य ज्यान मुद्दामा दोषी ठहर भएपश्चात जशलिङ्ग प्राथमिक विद्यालयका शिक्षक महान्द कपाडीलाई निलम्बन नगरी विद्यालयबाट पाउने तलब भत्ता सुविधा प्रदान गर्ने प्रधानाध्यापक र विद्यालय व्यवस्थापन समितिका अध्यक्षविरूद्ध पनि अख्तियारले मुद्दा दायर गरेको छ।
कपाडीले विद्यालय व्यवस्थापन समितिका अध्यक्ष देवराज कपाडी र स्रोतव्यक्ति हरिनाथ समेतको सहमतिमा ८१ हजार नौ सय रुपैयाँ सरकारी रकम लिएको अख्तियारले जनाएको छ।
घटनामा भ्रष्टाचार कसूर देखिएका विद्यालयका तत्कालीन शिक्षक/प्रधानाध्यापक महानन्द कपाडी, विद्यालय व्यवस्थापन समितिका अध्यक्ष देवराज कपाडी र स्रोत व्यक्ति हरि नाथलाई बिगो ८१ हजार नौ सय रुपैयाँ कायम बिगो असुलउपर गरी पाउन मागदाबी लिई विशेष अदालत, काठमाडौंमा आरोपपत्र दायर गरिएको प्रवक्ता कोइरालाले जानकारी दिए।