अमेरिकामा कम्पनी दर्ता गरिदिने भन्दै ठगी गर्ने अमेरिकी नागरिकलाई प्रहरीले पक्राउ गरेको छ।
महानगरीय अपराध महाशाखाले आइतबार क्षेत्रपाटीबाट ६५ वर्षीय ड्यानियल लि मिकजीलाई पक्राउ गरेको हो।
कोटेश्वर बस्ने टुकनारायण श्रेष्ठबाट उनले १० लाख ठगी गरेको आरोप छ। कोटेश्वरस्थित श्रेष्ठको एट्लास् सेक्युरिटी प्रालिलाई अमेरिकामा दर्ता गरी पार्टनर बनाउँछु भन्दै ठगी गरेको महाशाखाका एसपी इश्वर कार्कीले जानकारी दिए।
साथै उनले सुजन थापा र सन्दीप कार्कीलाई पनि विजनेस भिसामा अमेरिका लान्छु भनी जनही पाँच लाख मागेका थिए। सो कुरा प्रहरीले थाहा पाएपछि उनलाई पक्राउ गरेको हो।
‘लकडाउनअघि उ नेपाल आयो तर घर फर्किन सकेन अनि यता ठगीको धन्दा सुरू गर्यो,’ एसपी कार्कीले सेतोपाटीसँग भने। उनी नेपालमा पर्यटक भिसामा आएका थिए।
उनले अन्य व्यक्तिहरूलाई पनि ठगी गरेको हुन सक्ने भन्दै प्रहरीले सम्पर्कमा आउन आग्रह गरेको छ। प्रहरीका अनुसार उनकाे भिसा अवधि सकिएकाे छ। यसबारे अमेरिकी दूतावासलाई पनि जानकारी गराइसकेकाे प्रहरीले जनाएकाे छ।
