चिनियाँ र रूसी सरकारी सञ्चारमाध्यम र तीनका प्रमुख पत्रकार र विदेश मन्त्रालयका अधिकारीहरूले शुक्रबार गरेका ट्वीट अरू प्रयोगकर्ताको एकाउन्टभन्दा फरक देखिएका छन्।
चीन र रूसका सरकारी सञ्चारमाध्यमको बायोमै ट्वीटरले 'राज्य आवद्ध मिडिया'को फुर्को लगाइदिएको छ भने सरकारी निकायको खातामा चिनियाँ/रूसी सरकारको एकाउन्ट भनिएको ।
ट्वीटरले बिहीबार चीनको चाइना डेली, ग्लोबल टाइम्स, पिपुल्स डेली र रूसको रसिया टुडेको ट्वीटर अकाउन्टमा 'राज्य आवद्ध मिडिया' थपिदिएको हो।
होमपेजमा मात्र होइन उनीहरूले गर्ने हरेक ट्वीटमा यो फुर्को देखिन्छ।
सरकारले लगानी गरेका मिडिया र उनीहरूले प्रकाशन/प्रसारण गर्ने सामग्रीमा ती सरकारको हस्तक्षेप हुने भएकाले यस्तो लेबलिङ गर्नु परेको ट्वीटरको तर्क छ।
ट्विटरले तत्काल संयुक्त राष्ट्र संघको सुरक्षा परिषदका पाँच स्थायी राष्ट्र अमेरिका, बेलायत, फ्रान्स, चीन, रूसका राज्यद्वारा सञ्चालित मिडियालाई लेबल गर्ने भनेको छ। तर अन्य तीन राष्ट्रका भने कुनै मिडियालाई पनि त्यस्तो लेबल गरिएको छैन।
ट्वीटरकी पब्लिक पोलिसी एजिक्युटिभ जेसिका हेर्रिरा फ्लानिगानले यसको उद्देश्य चुनावको वर्षमा हुने सार्वजनिक बहसलाई सुरक्षित राख्नु भएको बताएकी छन्।
उनले यो लेबलिङ बिस्तारै अरू देशमा पनि लागु गरिने जानकारी दिइन्।