चितवनमा बिहीबार कोरोना संक्रमण पुष्टि भएका ७९ वर्षीय वृद्धका छोरा र बुहारीमा पनि कोरोना पोजेटिभ देखिएको छ।
भरतपुर अस्पताल कोभिड–१९ परीक्षण प्रयोगशालामा गरिएको परीक्षणका क्रममा उनीहरूमा पनि संक्रमण पुष्टि भएको हो।
४६ वर्षीय छोरा र ३८ वर्षीया बुहारीमा संक्रमण पुष्टि भएको भरतपुर अस्पतालका सूचना अधिकारी लिलाधर पौडेलले जानकारी दिए।
उनीहरू भरतपुर महानगरपालिका–१ का स्थायी बासिन्दा हुन्।
भरतपुरमा गरिएको परीक्षणका क्रममा अन्य दुई जनामा पनि कोरोना भाइरसको संक्रमण पुष्टि भएको प्रयोगशालाका प्रमुख डा.नितु अधिकारीले जानकारी दिइन्।
उनीहरू पर्साको वीरगञ्ज र सर्लाहीको लालबन्दी–११ का हुन्।
संक्रमण पुष्टि भएकी वीरगञ्ज–१० की ४२ वर्षीय महिला चितवन मेडिकल कलेजमा उपचार गराइरहेकी थिइन्।
सर्लाहीका ७९ वर्षीय पुरूषको बीपी कोइराला मेमोरियल क्यान्सर अस्पताल भरतपुरमा उपचार भइरहेको छ। उनीहरूको सम्बन्धित अस्पतालबाटै स्वाब संकलन गरिएको थियो।
शुक्रबार १३१ नमूनाको परीक्षण गरिएकोमा बाँकी १२७ वटा नमूनाको रिपोर्ट नेगेटिभ आएको छ।
