कालीकोट टिपर दुर्घटनाका घाइतेलाई नेपाली कांग्रेसका नेता भूपेन्द्रजंग शाहीले राहत वितरण गरेका छन्।
नरहरिनाथ गाउँपालिका वडा नम्बर १ लालिघाटमा भएको टिपर दुर्घटनामा ज्यान गुमाएका र घाइतेका परिवारलाई नगदसहित राहत रकम शाहीले वितरण गरेका हुन्।
जेठ २४ मा भएको टिपर दुर्घटना र घाइतेका परिवारलाई पाँच हजारका दरले नगद, मास्क, सेनिटाइजर, तेल, साबुन लगायत सामग्री वितरण गरेको शाहीले सेतोपाटीलाई जानकारी दिए।
दुर्घटनामा परेका घाइते पाँच महिनाका बालक देवराज सार्कीलाई कपडालगायत सामग्री सहयोग गरेको उनले बताए। उक्त दुर्घटनामा ज्यान गुमाएका पाँच परिवार र घाइते १० परिवारलाई राहत वितरण गरिएको हो।
टिपर दुर्घटनामा ज्यान गुमाएका तथा घाइतेका परिवारजनलाई सरकारले राहत नदिएको शाहीले बताए। उनले बाढी पहिरोमा परी ज्यान गुमाएका २५ जनाका परिवारलाई व्यक्तिगत रूपमा पाँच लाख बराबरको राहत उपलब्ध गराउने शाहीले बताए।
रास्कोट नगरपालिका प्रमुख प्रशासकीय अधिकृत प्रेमप्रसाद आचार्यले टिपर दुर्घटनामा ज्यान गुमाएकालाई किरिया खर्च ५० हजारका दरले उपलब्ध गराइएको बताए। नगर सभाबाट राहत उपलब्ध गराउन दश लाख पारित समेत भएको उनले जानकारी दिए।