गोंगबुमा क्रुरतापूर्वक हत्या गरिएका व्यक्तिको शव नजिकैकाे घरभित्रैबाट सुटकेसमा हालेर सडक छेउमा फालिएकाे पाइएको छ।
आइतबार गोंगबुको गणेशस्थान नजिकै सुटकेसभित्र टाउको विनाको शव फेला परेको थियो। शव भेटिएको ३ सय मिटर पर झोलामा टाउको र खुट्टा फेला परेको थियो।
‘प्रहरीको प्रारम्भिक अनुसन्धानले शव भएको सुटकेस नजिकैको घरबाट निकालिएको थाहा भएको छ,’ प्रहरी स्रोतले भन्यो,‘मृतक उक्त घरमा बेला बेलामा जाने गर्दथे।’
प्रहरीका अनुसार सोमबार तस्बिर सार्वजनिक भएपछि उनको मामा पर्ने नातेदार सम्पर्कमा आए। उनी सम्पर्कमा आएपछि मृतककाे परिचय सार्वजनिक भयो।
दाङ निवासी मृतक कृष्णबहादुर बोहोरा गोंगबु नयाँ बजार क्षेत्रको गार्मेन्ट उद्योगमा काम गर्थे।
आइतबार बाटोमा भएको एउटा सुटकेसबाट रगत बगेको देखेपछि स्थानीयले प्रहरीलाई खबर गरेका थिए।
तालिमप्राप्त कुकुरको सहयोगमा प्रहरीले टाउको र खुट्टा भएको झोला भने अलि पर भेट्टाएको थियो।
हामी सोमबार घटनास्थल पुग्दा प्रहरीहरू तैनाथ थिए। वरपरमा मानिसहरू जम्मा भएका थिए। महानगरीय प्रहरी परिसरका एसएसपी श्याम ज्ञवाली र अपराध महाशाखाका एसएसपी दीपक थापा घटनास्थलमा पुगेका थिए।
प्रहरीले घटनाबारे अनुसन्धान गरिरहेको बताएको छ। घटनामा संलग्न भएको आरोपमा प्रहरीले एक जना महिलालाई पक्राउ गरेको छ।
हेर्नुस् घटनास्थलका तस्बिरहरू :
सबै तस्बिर : नारायण महर्जन
सम्बन्धित समाचार :
गोंगबुमा क्रुर हत्या : शवको पहिचान खुल्यो
गोंगबुमा सुटकेसभित्र टाउको विनाको शव भेटियो
गोंगबुमा क्रुरतापूर्वक हत्या: सिसिटिभी फुटेज नियाल्दै प्रहरी
गोंगबुमा भेटिएको शवको सनाखत हुन नसक्दा प्रहरीलाई सकस